Kryeministri i Kinës Li Keqiang është shprehur se qeveria e tij do të nxitë sipërmarrjet kineze të investojnë në Serbi. Li e bëri këtë premtim gjatë takimit me presidentin serb Tomislav Nikoliç në Beograd të enjten, dita e fundit e vizitës së kryeministrit kinez në Serbi.

Presidenti serb Nikoliç shprehu mirëpritjen për investimet kineze, duke shtuar se vendi i tij do të forcojë bashkëpunimin dhe bashkërendimin me Kinën mbi çështjet ndërkombëtare dhe rajonale.

Po të enjten kryeministri i Kinës Li Keqiang përuroi me homologun e tij serb Alesandar Vuçiç urën Zemun-Borca mbi lumin Danub në Beograd.

"Kjo urë është një shenjë e miqësisë dhe marrëdhënieve të forta midis popullit serb dhe popullit kinez," u shpreh kryeministri Vuçiç.

Pas vizitës në Serbi kryeministri mbërriti sot në mëngjes në Tajlandë, ndalesa e fundit e turneut të tij në tre vende, i filluar më 14 dhjetor me vizitën zyrtare në Kazakistan. Në Tajlandë Li do të marrë pjesë në samitin e bashkëpunimit ekonomik të Mekongut të Madh. (Fang Xiaoyu/Artani)