Presidenti kinez Xi Jinping ka deklaruar se Kina do t'u ofrojë raundin e 4-t të ndihmës vendeve të Afrikës Perëndimore për të luftuar kundër ebolës.

Xi Jinping e bëri këtë deklaratë gjatë takimit me presidentin e Tanzanisë Jakaya Kikwete, që ndodhet për vizitë në Pekin.

Z. Xi tha se, duke marrë parasysh ecurinë e epidemisë së ebolës dhe nevojat e vendeve të prekura, Kina do të ofrojë një ndihmë të re me vlerë 500 milionë juanë (ose 80 milionë dollarë amerikanë) Liberisë, Sierra-Leones, Guinesë dhe organizatave ndërkombëtare.

Presidenti tanzanian Jakaya Kikwete e falënderoi Kinën lidhur me ndihmën për të luftuar ebolën në Afrikë.

Përveç ndihmës në para dhe materiale, Kina do të dërgojë këtë herë edhe personel tjetër mjekësor në vendet e Afrikës Perëndimore dhe do të ndihmojë në ndërtimin e një qendre mjekësore në Liberi. (Xu Guang/Artani)