Presidenti i Komisionit Europian Jose Manuel Barroso tha të premten se vota e Skocisë për të qëndruar në Mbretërinë e Bashkuar është pozitive për një Europë më të bashkuar dhe më të fortë.

Barroso shtoi se Komisioni Europian përshëndet faktin se gjatë debatit vitet e fundit qeveria dhe populli skocez kanë afirmuar në mënyrë të vazhdueshme angazhimin e tyre në Europë.

"Komisioni Europian do të vazhdojë të angazhohet në një dialog konstruktiv me qeverinë skoceze, në fushat që janë të rëndësishme për të ardhmen e Skocisë, duke përfshirë punësimin dhe rritjen ekonomike, energjinë etj," shtoi ai.

Skocia i tha "JO" pavarësisë në referendumin e së enjtes, duke vendosur të qëndrojë në Mbretërinë e Bashkuar, me 55.3 për qind të votave kundër dhe 44.7 për qind pro. (Albana)