Presidenti i Francës, Francois Hollande, tha të premten se avionët francezë kanë nisur sulmin e parë ajror ndaj militantëve të ISIS-it në Irak, të cilët kanë sekuestruar qytet të mëdha dhe kërcënojnë sigurinë rajonale.

Të enjten, kreu francez shpalli mbështetje ajrore për të asgjësuar militantët islamikë me kërkesë të autoriteteve irakiane, duke u zotuar se do të nisë së shpejti sulmet ajrore sapo të identifikohen objektivat.

Ndërkohë, Hollande tha se nuk do të dërgojë trupa tokësore në zonat e konfliktit.

"Nuk do të shkojmë përtej kësaj ... do të ndërhymë në Irak, pasi na u kërkua ndihmë nga autoritetet irakiane," tha Hollande në një takim për shtyp.

Kryeministri francez Manuel Valls pritet ta përshkruajë operacionin ushtarak francez në Irak javën e ardhshme në parlament, thuhet në deklaratë. (Albana)