Një aeroplan që i përket kompanisë ajrore shtetërore algjeriane "Air Algerie", me 119 veta në bord, u zhduk të enjten herët në mëngjes, 50 minuta pas ngritjes nga aeroporti "Ouagadougou" në Burkina Faso, njoftoi media vendore.
Aeroplani u zhduk në rajonin malian të Gaos, rreth 500 km në jug të kufirit me Algjerinë, u tha gazetarëve kryeministri algjerian Abdelmalek Sellal.
Një deklaratë e përditësuar e "Air Algerie" bën të ditur se në aeroplan kishte 112 udhëtarë dhe shtatë anëtarë të ekuipazhit.
Në Malin Verior ende ka sulme sporadike nga rebelët, pasi një grusht ushtarak shteti çoi në një kryengritje të armatosur që u shtyp në vitin 2013 nga trupat franceze dhe afrikane. (Artani)