Ministrat e mbrojtjes së NATO-s ranë dakord të martën për forcimin e mëtejshëm të masave të sigurisë në kuadër të krizës ruso-ukrainase si dhe shprehën mbështetjen ndaj reformave në Ukrainë.

"Ka ardhur koha që të gjithë aleatët të luajnë rolin e tyre dhe ata po e bëjnë këtë", theksoi sekretari i përgjithshëm i NATO-s Rasmussen, duke shtuar se "çdo aleat po kontribuon në mbrojtjen kolektive".

Ministrat ishin të një mendimi për të rritur aftësinë, trajnimin dhe gatishmërinë e forcave aleate në përgatitjen afatgjatë për përballimin e krizës. Ministrat e mbrojtjes së NATO-s u takuan me homologun ukrainas Mykhailo Koval, gjatë Komisionit NATO-Ukrainë.

Ata përshëndetën rezultatin e qartë të zgjedhjeve presidenciale në Ukrainë dhe rikonfirmuan mbështetjen për reformat e ndërmarra nga ky vend në fushën e sigurisë dhe të mbrojtjes. (Eda Merepeza)