Luftimet mes forcave qeveritare dhe atyre anti-qeveritare janë shtuar në lindje të Ukrainës, në prag të zgjedhjeve parlamentare të së dielës. Autoritetet e Kievit kanë urdhëruar vendosjen e trupave në rrethinat e qytetit Luhansk, në përpjekje për të ndaluar ndërprerjen e votimit.

Forcat antiqeveritare në Luhansk kanë shpallur gjendjen e jashtëzakonëshme këtë javë, pas vrasjes së 13 ushtarëve ukrainas në një sulm të befasishëm jashtë qytetit Donetsk. Banorët janë të frikësuar nga përshkallëzimi i luftimeve.

"Të shtënat nisën para lindjes së diellit. U dëgjua një shpërthim dhe unë pyeta çfarë ishte. Mendoj se kanë bombarduar urën", deklaron një banor.

Prej disa muajsh Ukraina është përfshirë nga trazirat.

Protestuesit anti-qeveritarë në lindje të vendit kanë shpallur pavarësinë nga Kievi dhe janë zotuar për prishjen e procesit të zgjedhjeve. Nga ana e tyre autoritetet e Kievit deklarojnë se do të jetë e pamundur që të ndërpritet votimi në disa zona në lindje të vendit.(Eda Merepeza)