Afro një e pesta e gazit që i duhet Ukrainës gjatë një viti do të dërgohet nga Slovakia. Nënshkrimi i një marrëveshjeje të tillë ka si synim të lehtësojë varësinë e Ukrainës nga gzi rus.

Kryeministri Arseniy Yatsenyuk, njoftoi ndërkohë se qeveria ukrainase dhe kompania Naftogaz kanë rënë dakord të dërgojnë bashkërisht në arbitrazh ndërkombëtar kompaninë ruse, Gazprom.

"Gazprom-it i janë dërguar dokumentet paraprake për arbitrazhin dhe brenda 30 ditëve ata duhet të japin një përgjigje të qartë. Mbi të gjitha mbi çështjen e çmimit. Ne këmbëngulin tek çmimi i fiksuar në fillim të vitit, si dhe të vazhdojmë të paguajmë në bazë të atij çmimi," tha Yatsenyuk.

Rusia së fundi ka rritur çmimet e gazit që furnizon Ukrainën si dhe ka kërkuar pagesa paraprake. Çmimi u rrit nga 268 dollarë për 1000 metra kub në 485 dollarë. (Leftion Peristeri)