Ministri i Jashtëm i Rusisë Sergei Lavrov tha të enjten në Moskë se ShBA-ja dhe Bashkimi Evropian po orvaten të shpërthejnë përsëri një "revolucion me ngjyrë" në Ukrainë, duke bërë ndërrimin e pushtetit me mjete jokushtetuese.

Në një fjalim të mbajtur në Institutin Shtetëror të Marrëdhënieve Ndërkombëtare të Moskës, numri një i diplomacisë ruse tha se vendet perëndimore nuk janë të shqetësuara për fatin e Ukrainës, por e vlerësojnë këtë vend si një gur shahu në lojërat gjeopolitike. Lavrovi shtoi po ashtu se ShBA-ja dhe partnerët e saj perëndimorë përpiqen të sillen si fitimtarë të Luftës së Ftohtë dhe kanë vepruar drejtpërdrejt në dëm të interesave ruse, duke mos e përfillur qëndrimin e Moskës në çështjet europiane. "Për të frenuar Rusinë, vendet perëndimore hoqën dorë nga fryma e partneritetit. Propaganda kundër Rusisë filloi edhe para krizës së Ukrainës dhe ShBA-ja e vendet europiane u përpoqën me të gjitha forcat të njollosnin Lojërat Olimpike Dimërore të Soçit," u shpreh kryediplomati rus Sergei Lavrov. (Wang Lei/Artani)