Kryetari i shtetit i Kinës Xi Jinping rithekoi në Bruksel dëshirën për forcimin e bashkëpunimit me Europën. Në një fjalim të mbajtur të martën në Kolegjin e Europës në Belgjikë, Xi Jinping bëri thirrje për ndërtimin e "urave" që lidhin të dy palët me paqe, zhvillim, reformë dhe qytetërim. Ai tha se Kina dhe Europa kanë nevojë për paqe, gjithëpërfshirje e dialog në vend të luftës, e ballafaqimit.

Lideri kinez i njohu të pranishmit me ndryshimet e thella që po ndodhin në Kinë, duke theksuar se reformat aktuale të vendit kanë hyrë në "një nivel më të avancuar ".

Ai nënvizoi se Kina, historikisht ka një mënyrë të vetën të të menduarit, ndaj ndryshon nga vendet e tjera. "Është e pamundur që Kina të kopjojë sistemin politik apo modelin e zhvillimit të të tjerëve. Po të ndodhte kjo do të ishte me pasoja katastrofike", shtoi Xi Jinping.

Belgjika është ndalesa e fundit e turit europian të Kreut të Shtetit të Kinës Xi Jinping . (Zhang Yan)