Sekretari amerikan i Shtetit Xhon Kerri u shpreh të martën në Arabinë Saudite, ku ndodhej për një vizitë zyrtare, se ShBA-ja shpreson në zgjidhjen e krizës siriane me mjete politike.

Kerri tha në një konferencë të përbashkët shtypi me homologun e vet saudit se, në kushtet e acarimit dita-ditës të gjendjes në Siri, Uashingtoni shpreson që kriza do të zgjidhet politikisht nëpërmjet krijimit të një qeverie kalimtare, ku të përfshihen si opozita, ashtu edhe qeveria e tanishme. Kreu i diplomacisë amerikane u shpreh gjithashtu që, nëse qeveria siriane i shpërfill paralajmërimet dhe përdor armë kimike, atëherë ShBA-ja do të shtojë ndihmën ndaj kryengritësve. (Vera/Artani)