Presidenti i ri kinez Xi Jinping premtoi të enjten se vendi i tij do të zgjerojë bashkëpunimin me Organizatën e Kombeve të Bashkuara duke plotësuar detyrimet ndërkombëtare.

Gjatë një bisede telefonike me sekretarin e përgjithshëm Ban Ki-moon, Xi tha se Kina do të punojë me Kombet e Bashkuara për të mbrojtur drejtësinë ndërkombëtare dhe për të promovuar bashkëpunimin mes vendeve për të kontribuuar në zhvillimin paqësor të globit.

Kina ka qenë një mbështetës i vazhdueshëm i Kombeve të Bashkuara, i tha presidenti kinez zotit Ban, duke shtuar se Pekini ka mbrojtur qëllimet dhe parimet e Kartës së OKB-së dhe ruajtur autoritetin e Kombeve të Bashkuara, duke respektuar rolin e saj në çështjet botërore, shtoi Xi.

Ban e uroi presidentin Xi për detyrën e re dhe u shpreh besimplotë se populli kinez do ta realizojë ëndrrën e tij nën udhëheqjen e Xi.

Shefi i OKB-së falënderoi Kinën për bashkëpunimin dhe shprehu besimin për thellimin e tij edhe më tej. (Leftion Peristeri)