Kongresi i 18-të Kombëtar i Partisë Komuniste të Kinës do të hapet më 8 nëntor. Si një ngjarje e rëndësishme politike, ai ka tërhequr vëmendjen edhe të ekspertëve francezë të qarqeve të ndryshme. Një prej tyre është edhe Erik dë la Mezonëvi, gjeneralmajor dhe kryetar i Shoqatës së Strategjisë, e njëkohësisht edhe specialist për çështjet kineze.
Mezonëvi i kushton rëndësi të madhe Kongresit të PKK-së, i cili sipas tij është shumë i rëndësishëm për të ardhmen politike e ekonomike të Kinës. Njëkohësisht, ai thekson se fjalimet e brezit të ri të udhëheqësve kinezë do të pasqyrojnë politikat e brendshme dhe të jashtme të Kinës. Më tej ai shton:
"Unë kam më shumë interes për çështjet shoqërore e ekonomike të Kinës, si p. sh. sistemi i sigurimeve mjekësore, arsimi dhe strehimi, politikat financiare dhe ndryshimet e përmbajtjet e reja të diplomacisë."
Eksperti francez vë në dukje veçanërisht që, përballë krizës europiane të borxheve, qëndrueshmëria e Kinës do të shtojë edhe besimin e qëndrueshmërinë në Europë e në mbarë botën.
"Në sistemin botëror ekzistojnë kriza. Në këtë situatë, ka nevojë që disa rajone të ruajnë qëndrueshmërinë, e një prej tyre është edhe Kina. Zhvillimi ekonomik i Kinës do të ndikojë pozitivisht në tërë botën, d. m. th., nëse Kina zhvillohet mirë, edhe bota do të zhvillohet mbarë ose më mirë," shprehet specialisti francez i çështjeve të Kinës Erik dë la Mezonëv. (Wang Xianya/Artani)