Në plenumin katërditor sekretari i përgjithshëm i Komitetit Qendror të 17-të të PKK-së Hu Jintao mbajti një raport mbi punën e këtij komiteti, si dhe u diskutuan ndryshimet në statutin e partisë. Raporti dhe ndryshimet do t'i paraqiten Kongresit të 18-të për shqyrtim.
Në plenum u përgjithësua gjithashtu edhe puna e Partisë në pesë vjetët e kaluar. Pjesëmarrësit ishin të mendimit njëzëri se, në kushtet e gjendjes së ndërlikuar në arenën ndërkombëtare dhe të detyrës së vështirë të brendshme në fushën e nxitjes së reformës e të zhvillimit dhe të ruajtjes së qëndrueshmërisë shoqërore, KQ i PKK-së, i kryesuar nga z. Hu Jintao dhe duke u mbështetur te masat popullore, ka përballuar me sukses vështirësi dhe sfida të shumëllojshme. Gjatë këtyre pesë vjetëve ekonomia e vendit ka ruajtur zhvillimin e qëndrueshëm, reforma dhe hapja ndaj botës së jashtme ka pasur progres të madh, niveli i jetesës së popullit është ngritur në mënyrë të dukshme, puna e krijimit të një sistemi ligjor e demokratik ka hedhur hapa të reja dhe Kina ka pasur përparim të rëndësishëm në fushën kulturore, shoqërore, ushtarake, diplomatike etj. "Socializmi me karakteristika kineze është zbatuar me këmbëngulje e zhvillim," u tha në plenum.
Në plenum u shqyrtuan dhe u miratuan edhe vendimet e Komisionit Qendror të Disiplinës për përjashtimin nga partia të Bo Xilai-t (ish-anëtar i Byrosë Politike të KQ të PKK-së) dhe të Liu Zhijun-it (ish-ministër i Hekurudhave).
(Çan Jean/Artani)
