"Blerja" e paligjshme nga Japonia e ishujve Diaoyu të Kinës sigurisht do të prekë dhe do të dëmtojë zhvillimin e marrëdhënieve ekonomike dhe tregtare ndërmjet të dy vendeve, u shpreh të mërkurën Ministria e Tregtisë e Kinës (MTK).

"Kjo nuk është ajo që dëshirojmë ne, por Japonia duhet të mbajë përgjegjësinë e plotë për një gjë të tillë", u shpreh zëdhënësi i kësaj ministrie Shen Danyang në një konferencë të rregullt shtypi.

Mosmarrëveshja lidhur me ishujt Diaoyu ka hedhur tashmë një hije mbi tregtinë kino-japoneze, teksa një pjesë e mirë e udhëtimeve në Japoni janë anuluar nga agjencitë turistike kineze. Edhe shitjet e prodhimeve japoneze, sidomos të automobilave dhe të pajisjeve elektronike, kanë rënë ndjeshëm në Kinë gjatë muajit të kaluar.

Kina është partnerja më e madhe tregtare e Japonisë, ndërsa Japonia renditet e katërta ndër partnerët tregtarë të Kinës. Tregtia midis dy vendeve zë rreth 20 për qind të vëllimit të përgjithshëm të tregtisë së jashtme të Japonisë. (Artani)