Të gjithë partnerët tregtarë duke përfshirë edhe SHBA-në duhet të respektojnë rregullat e OBT-së, duke mbrojtur bashkërisht sistemin tregtar shumëpalësh, u shpreh zëdhënësi i Ministrisë kineze të Tregtisë Shen Danyang të mërkurën, në Pekin. Shen Danyang shtoi se më 17 shtator, Kina parashtroi kërkesën për konsultime brenda sistemit të OBT-së. Po këtë ditë, presidenti amerikan Barak Obama shpalli se i ka paraqitur OBT-së pretendimet për subvencionet e Kinës për prodhimin e automobilave.

Zëdhënësi i Ministrisë kineze të Tregtisë ritheksoi se pala kineze respekton rregullat e OBT-së dhe kundërshton proteksionizmin tregtar. "Kina nuk është e angazhuar në proteksionizëm tregtar dhe shpreson se të gjithë partnerët tregtarë duke përfshirë edhe palën amerikane, do të respektojnë rregullat e OBT-së, në mbrojtje të sistemit tregtar shumëpalësh, " tha ai. (Du/Albana)