Më 9 shtator, në Vlladivostok të Rusisë u mbajt takimi i 20-të i udhëheqësve të Bashkëpunimit Ekonomik të Azi-Paqësorit (APEK).
Kryetari i Shtetit i Kinës Hu Jintao ishte i pranishëm në këtë takim ku mbajti dhe një fjalim rreth bashkëpunimit mbi garantimin e ushqimit, liberalizimin e tregtisë dhe për fusha të tjera prioritare.
Hu Jintao theksoi se garantimi i ushqimit është thelbësor jo vetëm për ekonominë e një vendi, por edhe për jetesën e njerëzimit. Ai shtoi se duhet të thellohet bashkëpunimi për të trajtuar këtë çështje.
"Anëtarët e APEK-ut duhet të bëjnë përpjekje për të nxitur investimet në bujqësi, të rrisin produktivitetin në bujqësi dhe rritjen e prodhimit. Duhet të forcojmë zhvillimin e infrastrukturës së tregjeve të ushqimit. Duhet të nxisim investimet në bujqësi dhe të ngrihet niveli i përgjithshëm i prodhimit bujqësor. Duhet të stabilizohen çmimet e mallrave kryesore dhe të përmirësohet mjedisi i investimeve bujqësore. Duhet të marrim masa konkrete për të garantuar furnizimin me ushqim në situatat e vështira," u shpreh Hu Jintao.
Përsa i përket inovacionit, Hu Jintao tha se duhet të krijojmë mjedisin dhe kushtet e përshtatshme për inovacionet, duke forcuar politikat mbështetëse. Anëtarët e APEK-ut duhet të zgjerojnë invetimet në studimet shkencore. Qeveria duhet të luajë një rol të rëndësishëm, të ndërtojë platformën e bashkëpunimit për ndërmarrjet. (Zhan Dian/Albana)