Më 9 shtator përfundoi në qytetin bregdetar të Rusisë Vladivostok Samiti i APEK-ut me publikimin e deklaratës së përbashkët nga liderët e vendeve anëtare të kësaj organizate.
Sipas deklaratës, samiti përcaktoi drejtimin e zhvillimit të mëtejshëm rajonal dhe objektivin për konsolidimin e pozicionit drejtues të ekonomive rajonale në ekonominë botërore.
Në deklaratë bëhet gjithashtu një përmbledhje e katër temave më të rëndësishme të samitit: liberalizimi i tregtisë dhe i investimeve, forcimi i sigurisë ushqimore, krijimi i një zinxhiri të besueshëm furnizimi dhe nxitja e bashkëpunimit në fushën e rritjes dhe të krijimit të risive.
Në fund të deklaratës anëtarët e APEK-ut shprehen se, duke pasur parasysh situatën e paqëndrueshme financiare, do të vazhdojnë të marrin masat e nevojshme për të pakësuar ndikimet negative dhe për të forcuar qëndrueshmërinë e ekonomive të tyre.
Takimet në kuadër të Samitit të APEK-ut nisën më 2 shtator në Vladivostok, duke u pasuar nga takimi i udhëheqësve të 21 vendeve dhe rajoneve anëtare të APEK-ut që u mbajt këtë fundjavë. (Wang Xianya/Artani)