Kryeministri, njëkohësisht kryetar i Partisë Demokratike, Sali Berisha dhe numri një i Partisë Socialiste të opozitës, Edi Rama pritet të bisedojnë të dielën në mbrëmje për zgjedhjen e Presidentit të ri të Shqipërisë.
Lajmi i publikuar më herët nga mediat e Tiranës, është konfirmuar nga kryetari socialist.
"Kemi marrë ftesën për takim dhe kemi pranuar. Ndoshta është vonë, por më mirë vonë se kurrë", deklaroi kreu i PS-së, Edi Rama gjatë një interviste për televizionin "Top Channel".
Takimi do të zhvillohet në kryesinë e Kuvendit. Të pranishëm do të jenë edhe drejtuesit e grupeve parlamentare të PD-së dhe PS-së, Astrit Patozi dhe Gramoz Ruçi. Socialistët, më herët, parashtruan kushtin për përmbylljen paraprake të reformave dhe kufizimin e imunitetit, ndërsa kandidatin e mazhorancës Xhezair Zaganjori, e quajtën të njëanshëm.
Raundi i dytë i votimit për presidentin pritet të zhvillohet të hënën dhe rezultati i takimit mes Berishës dhe Ramës do të konfirmojë nëse në këtë votim do të shkohet zyrtarisht me një kandidat konsensual.Raundi i parë u konsumua pa votim të mërkurën. (Ardi Pulaj)