Kryesocialisti grek thotë se mund të formojë një koalicion që do t'i japë fund pezullit paszgjedhor në vend.

Kryetarit të PASOK-ut Evangelos Venizellos iu dha mandati për të formuar një koalicion pas dështimit të krerëve të dy partive të tjera. Ai takoi kreun e Partisë së Majtë Demokratike Fotis Kuvelis, i cili tha se ishte i gatshëm për të marrë pjesë në koalicion.

"Unë propozoj formimin e një qeverie gjithëpërfshirëse, me figura të besuara politike, që do të respektojë mandatin e popullit. Misioni i kësaj qeverie, e cila do të ketë një program të veçantë dhe mandat deri në vitin 2014, do të jetë i dyfishtë: së pari, mbajtja e vendit në Bashkimin Evropian dhe, së dyti, nisja e çlirimit shkallë-shkallë të vendit nga marrëveshja e borxhit," deklaroi Kuvelisi.

Zgjedhjet e sapozhvilluara në Greqi krijuan një parlament ku partitë pro dhe kundër masave shtrënguese kanë fituar një numër të përafërt mandatesh.

BE-ja ka pranuar të livrojë 4 prej 5 miliardë eurove të një plani ndihme, duke i mbajtur 1 miliard të tjera për në qershor. Zyrtarët e Eurozonës gjithashtu thanë se ata janë të gatshëm të sigurojnë fonde të mjaftueshme për ta mbajtur Greqinë derisa ky vend ta qartësojë vendimin e vet politik. (Artani)