Koloneli izraelit: "Mbi 90% e objekteve në Shqipëri mund të rikonstruktohen"

Koloneli izraelit Golan Vach po drejton grupin e tij të inxhinierëve në zonat e prekura nga tërmeti ku është shpallur gjendja e emergjencës.

Grupi i inxhinierëve, urbanistëve dhe arkitekteve nga Izraeli kanë mbi 5 ditë që po punojnë në terren dhe po asistojnë me grupet shqiptare. Me eksperiencë të gjatë antisizmike, koloneli Golan Vach thotë se mbi 90% e objekteve janë riparueshme dhe se po punohet ngushtësisht me ministrin Çuçi dhe zv.ministrin Shkreli për të zgjidhur sa më shpejt situatën.

"Ne po asistojmë në disa drejtime për t'u ardhur në ndihmë banorëve të prekur nga tërmeti. Kemi inspektuar qindra objekte dhe vazhdojnë punën tonë në terren me burime njerëzore dhe logjistikë. Deri tani mund të themi se mbi 90% e objekteve mund të riparohen përmes një ndërhyrjeje rrënjësore".

"Ne kemi marrëdhënie të veçantë më Shqipërinë. Fatkeqësisht ka humbje jete dhe të tjerë pa shtëpi. Dua t'ju siguroj se jemi këtu për të bërë gjithçka për të ndërtuar objektet e banimit për të gjithë të prekurit", – u shpreh kolonel Golan Vach. (ATSH)