Kina dhe bota duhet të ndërtojnë së bashku "Urën drejt lulëzimit"

Këto ditë Kina ka qenë pa dyshim në fokus të mediave ndërkombëtare.

Të hënën presidenti kinez Xi Jinping mbajti një fjalim në Ekspozitën e parë Ndërkombëtare të Importit të Kinës, ku propozoi ndërtimin e përbashkët të një ekonomie të hapur inovative dhe gjithëpërfshirëse. Ai shpalli se Kina do të marrë pesë masa kryesore për të zgjeruar hapjen ndaj botës, do të nxitë potencialin e importit dhe do të lehtësojë hyrjen në treg. Ndërkohë të martën, kryeministri kinez Li Keqiang zhvilloi dialogun "6+1" me drejtuesit e gjashtë organizatave kryesore ekonomike ndërkombëtare, si Banka Botërore, Fondi Monetar Ndërkombëtar, Organizata Botërore e Tregtisë etj. Palët zhvilluan diskutime lidhur me bashkëpunimin e hapur dhe me përfitime të përbashkëta ndërmjet Kinës e botës. Kryeministri Li Keqiang ritheksoi se Kina do të nxitë hapjen e nivelit të lartë dhe zhvillimin me cilësi të lartë.

Po atë ditë, zv.presidenti i Kinës Wang Qishan u shpreh në Forumin e Ekonomisë së Inovacionit të vitit 2018 në Singapor se Kina do të këmbëngulë në trajtimin e çështjeve të veta, do të hapet më tej ndaj botës dhe do të nxitë bashkë me vendet e tjera një ekonomi më të hapur, më gjithëpërfshirëse, më të barabartë dhe me përfitime të ndërsjella më të mëdha.

Në të njëjtën kohë, në Kinë janë organizuar gjithashtu Ekspozita Ndërkombëtare e Aviacionit dhe e Aeronautikës e Kinës dhe Konferenca e 5-të Botërore e Internetit. Kina me veprime të hapura ka treguar vendosmërinë për zhvillimin e përbashkët me mbarë botën.

Bashkëpunimi i hapur i Kinës me botën është një nga rezultatet e arritura nga Reforma e Hapja e nisur 40 vjet më parë. Gjatë këtyre 40 vjetëve, të ardhurat e banorëve të Kinës janë rritur 25 herë dhe GDP-ja është dyfishuar çdo tetë vjet. Mbi 700 milionë kinezë kanë dalë nga varfëria, duke zënë 70 % të numrit të përgjithshëm të atyre që kanë dalë nga varfëria në botë. Kina ka dhënë kështu një ndihmesë të rëndësishme për zhvillimin e botës.

Rezultatet e Kinës janë arritur me vështirësi. Ato mbështeten në shpirtin punëtor të popullit kinez dhe thellimin e reformës e zgjerimin e hapjes.

Drejtorja Ekzekutive e Fondit Monetar Ndërkombëtar Christine Lagarde mendon se "Kina po ndërton një urë drejt lulëzimit". Në nëntë muajt e parë të këtij viti, përqindja e kontributit të konsumit në GDP-në e Kinës arriti në 78 %, teksa para pesë vjetëve, kjo shifër ishte 50 %. "Ndërtimi" i kësaj "ure" është jo vetëm nevojë e kinezëve, por edhe e mbarë botës.

Sivjet mbushen dhjetë vjet nga fillimi i krizës financiare ndërkombëtare. Gjatë kësaj kohe, bashkësia ndërkombëtare bashkëpunoi e doli nga vështirësitë dhe ekonomia botërore ka shfaqur tani prirjen e rimëkëmbjes. Megjithatë, tani përpara saj kanë dalë rreziqe dhe sfida. Sidomos në dy vjetët e fundit, globalizimi ekonomik ka pësuar krizë, proteksionizmi tregtar është rritur dhe kanë lindur mosmarrëveshje tregtare.

Presidenti i Bankës Botërore Jim Yong Kim është shprehur se në horizont janë shfaqur disa re të errëta dhe se ata parashikojnë se rritja e ekonomive të reja do të ngadalësohet. Organizatat kryesore financiare ndërkombëtare, duke përfshirë Bankën Botërore, kanë ulur parashikimin për rritjen e ekonomisë globale.

Sekretari i Përgjithshëm i Organizatës për Bashkëpunimin e Zhvillimin Ekonomik Angel Gurria vuri në dukje se arsyeja e uljes së parashikimit është shtimi i taksave doganore dhe i tensioneve tregtare. Sivjet tregtia globale do të rritet 3%, duke u ulur 4-5 pikë përqindjeje në krahasim me situatën e zakonshme, dhe arsyeja kryesore për këtë janë mosmarrëveshjet tregtare, u shpreh Gurria.

Ekonomia botërore ndodhet në një udhëkryq të ri. Qëndrimi dhe veprimi i Kinës për zhvillimin e ekonomisë botërore është shumë i rëndësishëm. Edhe politikat makroekonomike të vendeve të ndryshme të botës duhet të bashkërendohen dhe ato duhet të zgjerojnë hapësirën e bashkëpunimit me anë të hapjes. (Çang Çuo)