Kina importoi 4.7 mln tonë gaz të lëngshëm natyror në gusht

Kina importoi mbi 4.7 milionë tonë gaz të lëngshëm natyror në gusht, një rritje kjo 50 për qind në krahasim me një vit më parë.

Importi i përgjithshëm i këtij gazi në tetë muajt e parë arriti mbi 30 milionë tonë, duke u rritur 47 për qind nga një vit më parë.

Sipas kompanisë "IHS Markit", Kina tejkaloi Korenë e Jugut duke u bërë importuesja e dytë më e madhe në botë e gazit të lëngshëm vitin e kaluar.

Rritja e importeve të gazit natyror në Kinë ka ardhur për të përmbushur rritjen e konsumit të brendshëm, të nxitur kryesisht nga politikat mjedisore për të zëvendësuar prodhimin e energjisë nga qymyrguri.

Sipas një raporti nga kjo industri, Kina ka gjasa të tejkalojë Japoninë dhe të bëhet importuesja e parë në botë e gazit të lëngshëm natyror vitin e ardhshëm, me importet që pritet të arrijnë në 170 miliardë metër kub deri në vitin 2023, kryesisht gaz të lëngshëm natyror. (Albana)