Samiti i tretë Kim-Moon do të mbahet në shtator

Koreja e Jugut dhe Koreja e Veriut ranë dakord të hënën për të mbajtur një samit të tretë midis presidentit të Koresë së Jugut Moon-Jae-in dhe liderit suprem të Koresë së Veriut Kim Jong Un. Samiti do të mbahet në Phenian në muajin shtator.

Marrëveshja për samitin u arrit pas bisedimeve të nivelit të lartë midis të dyja palëve në fshatin kufitar, Panmunjom.

Në deklaratën e përbashkët, të lëshuar pas bisedimeve, u tha se të dyja Koretë ranë dakord të zhvillojnë takimin Moon-Kim në Phenian përpara fundit të shtatorit.

Kryetari i Komitetit për Ribashkimin Paqësor të Atdheut, Ri Son Gwon, i cili udhëhoqi delegacionin e Koresë së Veriut, tha për gazetarët pas përfundimit të bisedimeve, se tashmë palët kishin arritur në një itinerar të hollësishëm për samitin që do të mbahet në shtator. (Haris)