2018-07-06 10:59:47 | CRI | Komenti juaj | Printoni |
Partia "Bashkimi për një të Ardhme më të Mirë" (SBB) zgjodhi mbrëmjen e së enjtes kryetarin e saj Fahrudin Radonçiç si kandidat për anëtar të presidencës trepalëshe të Bosnjë-Hercegovinës në zgjedhjet e ardhshme të përgjithshme.
Në fjalimin e tij drejtuar anëtarëve të partisë, Radonçiçi tha se qëllimi kryesor i kandidaturës së tij është të sjellë investime të huaja dhe të krijojë më shumë vende pune në Bosnjë-Hercegovinë.
"Ne duhet ta bëjmë politikën e re të përgjegjshme ndaj shtetasve të Bosnjë-Hercegovinës. Unë jam i gatshëm ta justifikoj besimin tuaj dhe të përfaqësoj interesat e të gjithë njerëzve që jetojnë në Bosnjë-Hercegovinë dhe interesin e vendit", tha ai.
Kjo është hera e tretë që Radonçiçi, një biznesmen 61-vjeçar, kandidon për presidencën e Bosnjë-Hercegovinës. Ai do të konkurrojë si kandidat boshnjak për anëtar të presidencës trepalëshe të Bosnjë-Hercegovinës, e cila përfaqëson tre grupet etnike të vendit: boshnjakët, serbët dhe kroatët.
Zgjedhjet e përgjithshme në Bosnjë-Hercegovinë do të zhvillohen më 7 tetor.