2018-07-06 10:58:47 | CRI | Komenti juaj | Printoni |
Kryetari i Kuvendit Gramoz Ruçi prit në një takim Presidenten e Senatit të Holandës, Anki Brukers-Knol, dhe delegacionin që e shoqëronte, të cilët po zhvillojnë një vizitë zyrtare në Shqipëri.
Ky ishte takimi i parë i Kryetarit të Kuvendit pas Vendimit të Këshillit Europian, i cili iu përgjigj pozitivisht rekomandimit të Komisionit dhe përcaktoi rrugën drejt hapjes së negociatave të pranimit me Shqipërinë në qershor 2019.
Kryetari Ruçi i shprehu Presidentes Anki Brukers-Knol mirënjohjen e Kuvendit të Shqipërisë si edhe të gjithë shqiptarëve, për mbështetjen e vazhdueshme dhe korrekte të Holandës për perspektivën europiane të Shqipërisë.
"Ne jemi të bindur se në qëndrimin e Holandës për çështjen e hapjes së negociatave me Shqipërinë nuk ka asnjë grimcë paragjykimi, por vetëm vëmendje e kujdes të natyrshëm", – nënvizoi Ruçi.
Nga ana e saj Presidentja Anki Brukers-Knol theksoi Holanda është e bindur se Shqipëria është një vend europian dhe me një të ardhme të qartë europiane. Qëndrimi i Holandës për çështjen e hapjes së negociatave është një mundësi shumë e mirë për të nxitur Shqipërinë të luftojë më ashpër kundër krimit të organizuar dhe korrupsionit. Vetting-u është një rast unik dhe rezultatet që ju keni arritur në këtë aspekt janë impresionuese. Ajo shprehu bindjen se në qershor 2019 negociatat me Shqipërinë do të hapen. (ATSH)