Li Xiangjun lindi në vitin 1624, babai i saj ishte një oficer i dinastisë Ming (vitet 1368 - 1644 pas erës sonë). Për shkak të konfliktit politik, babai i saj u dënua gjoja për krime nga forca politike e eunukut, që ishte një forcë politike e ligë e fundit të dinastisë Ming. Familja e Li Xiangjun-it u dobësua shumë shpejt dhe në moshën 8-vjeçare ajo u adoptua nga kurtizania e njohur Li Zengli, e cila e bëri Li Xiangjun-in kurtizanen më të njohur me talente të shkëlqyeshme në poezi, bukurshkrim, muzikë, pikturë etj. Kur ishte 16 vjeçe Li Xiangjun-i u takua për herë të parë me djalin e njohur fisnik Hou Fangyu dhe i lindi për të dashuria e përjetshme me shikimin e parë. Tani do t'ju njohim me dashurinë e kësaj kurtizaneje parimore që ka jetuar në fund të dinastisë Ming dhe fillim të dinastisë Qing.
Hou Fangyu ishte një nga katër djemtë fisnikë më të njohur në fund të dinastisë Ming dhe një nga tre shkrimtarët e mëdhenj të fillimit të dinastisë Qing. I ati ishte ministër financash i dinastisë Ming dhe anëtar i forcës politike "Donglin", e cila ishte një forcë e drejtë politike dhe kundërshtari kryesor i forcës së eunukut gjatë asaj kohe.
Hou Fangyu zuri vendin e parë në provimin fillestar të komunës për zgjedhjen e funksionarëve. Në vjeshtën e vitit 1639 Hou Fangyu erdhi në qytetin Nankin për të marrë pjesë në provimin e mëtejshëm për përzgjedhjen e funksionarëve të ardhshëm. Në këtë qytet ai u takua me kurtizanen e njohur Li Xiangjun dhe të dyve u lindi shpejt dashuria për njëri-tjetrin, duke bërë piktura dhe shkruar poezi së bashku çdo ditë. Ata i dhanë fjalën njëri-tjetrit që do të plakeshin së bashku. Hou Fangyu i dhuroi Li Xiangjun-it një erashkë mbretërore si simbol të dashurisë së tyre.
Në atë kohë, si një kurtizane aq e njohur dhe e virgjër, Li Xiangjun-it i duhej një ceremoni solemne martese në moshë të rritur. Në këtë ceremoni duhej të ftoheshin zotërinj të famshëm fisnikë e të kulturuar dhe t'i jepeshin shumë para kujdestares së Li Xiangjun-it. Por Hou Fangyu nuk kishte aq shumë para. Në këtë kohë të vështirë miku i tij Yang Longyou i dha në kohë një ndihmë të madhe me shumë para për këtë ceremoni solemne. Por këto nuk ishin paratë e Yang Longyou-së, por të anëtarit të forcës politike të eunukut Yuan Dacheng, i cili ishte një dramaturg dhe letrar i shkëlqyeshëm në fundin e dinastisë Ming, por me një moral dhe famë shumë të keqe. Në atë kohë, forca e eunukut po pësonte goditje të madhe politike dhe Yuan Dacheng-u ishte hequr nga posti i funksionarit të lartë. Ai i dhuroi para Hou Fangyu-së për ta joshur të merrte pjesë në forcën e tyre politike, për shkak se babai i Hou Fangyu-së ishte zyrtar i lartë dhe vetë Hou Fangyu ishte djalë fisnik i famshëm me talent. Pasi mësoi identitetin e vërtetë të dhuruesit, Hou Fangyu ishte në mëdyshje t'i kthente apo jo këto para, por Li Xiangjun-i u zemërua dhe e kritikoi rreptë Hou Fangyu-në për pranimin e parave jo të pastra. Li Xiangjun-i shiti të gjitha sendet dhe stolitë e veta të çmuara dhe filloi të merrte hua nga miqtë. Më në fund ajo mblodhi para të mjaftueshme dhe ia ktheu Yuan Dacheng-ut.
Veprimi i Li Xiangjun-it e ofendoi rëndë Yuan Dacheng-un, i cili u betua që do të hakmerrej ndaj çiftit në të ardhmen. Me ndryshimin e gjendjes politike në fundin e dinastisë Ming, perandori Chongzheng vrau veten pasi kryengritësit fshatarë zunë kryeqytetin e kësaj dinastie, Pekinin. Mbreti Zhong Yousong u bë perandori i ri me përkrahjen e forcës së eunukut dhe formoi qeverinë e re të pjesës jugore të Kinës në Nankin. Yuan Dacheng u emërua si ministri i ri i mbrojtjes. Pasi mori shumë pushtet, Yuan Dacheng-u filloi menjëherë goditjen dhe hakmarrjen ndaj forcave kundërshtare të tij, si fraksioni "Donglin" etj. Hou Fangyu e kishte parashikuar këtë hakmarrje, prandaj u arratis jashtë.
Pas largimit të Hou Fangyu-së, Li Xiangjun-i refuzoi t'i shërbente çdo mysafiri tjetër dhe ia ngulte sytë çdo ditë erashkës mbretërore, dhuratës dashurore të Hou Fangyu-së, duke shprehur qartë dashurinë e saj besnike. Por Yuan Dacheng-u nuk e harroi ofendimin e Li Xiangjun-it, ai e nxiti funksionarin e besuar të perandorit të ri, Tian Yang-un, ta merrte Li Xiangjun-in si konkubinë. Një ditë Tian Yang-u mblodhi shumë shërbyes dhe solli një bartinë dasme në shtëpinë e Li Xiangjun-it për ta detyruar vajzën të martohej me të. Li Xiangjun-i refuzoi pa ngurrim, por Tian Yang nguli këmbë për këtë martesë. Li Xiangjun-i e lëndoi kokën te parmakët e shkallëve dhe gjaku i saj rrodhi në erashkën e dashurisë. Tian Yang-u, që u frikësua se mos Li Xiangjun-i vdiste, u kthye me zhgënjim të thellë. Më vonë, miku Yang Longyou pikturoi në këtë erashkë një dru me shumë lule pjeshke duke përdorur pikat e gjakut të Li Xiangjun-it dhe kjo erashkë dashurie u emërtua "Erashka e luleve të pjeshkës".
Më vonë qeveria jugore e perandorit Zhong Yousong u përmbys nën sulmet e fiseve nomade të Kinës Veriore, kombësisë man. Li Xiangjun-i u fsheh në një tempull budist duke u hequr si murgeshë dhe pas një viti Hou Fangyu e gjeti në këtë tempull.
Edhe sot shumë historianë kinezë i vlerësojnë lart ndikimet pozitive të Li Xiangjun-it në historinë e Kinës. Ajo ishte vetëm një kurtizane e thjeshtë, por parimet e larta morale të saj kanë prekur shumë breza të kinezëve. Ajo është bërë një shembull dhe është quajtur si kurtizania me parime të larta morale.
