Zhao Feiyan ishte një nga konkubinat  e perandorit Han Chengdi (vitet 45 - 1 para erës sonë). Meqenëse vallëzonte me shkathtësi të madhe si një dallëndyshe në fluturim, ajo u quajt "Feiyan", me kuptimin "dallëndyshja fluturuese".

Zhao Feiyan ishte gruaja e dytë e Han Chengdi-së. Ajo ishte një bukuroshe e ftohtë, por me një mjeshtëri të shkëlqyeshme në vallëzim. Ajo së bashku me motrën e vet të vogël Zhao Hede u bënë dy konkubinat  më të dashuruara prej Han Chengdi-së. Përse Zhao Feiyan dhe e motra mundën të fitonin dashurinë e plotë të perandorit Han Chengdi? Tani do t'ju tregoj historinë e kësaj "dallëndysheje fluturuese".
I ati i Zhao Feiyan-it, Zhao Lin, ishte një shërbëtor i varfër. Pas lindjes së Zhao Feiyan-it, ai nuk mund ta rriste të bijën për shkak të varfërisë dhe e braktisi atë në shkretëtirë. Por, pasi u kthye në shtëpi, Zhao Lin-i shihte herë pas herë në ëndërr  një foshnjë që qante e pikëlluar. Prandaj ai ndjeu pendesë për braktisjen e së bijës dhe pas 4 ditësh shkoi përsëri në shkretëtirë për ta kërkuar. Dhe shumë çuditërisht, e gjeti të gjallë. Zhao Lin-i e mbajti të bijën në shtëpi dhe filloi ta rriste me mundime. Meqë familja e saj ishte shumë e varfër, Zhao Feiyan-in e shitën te familja e princeshës Yanga për të shërbyer si kërcimtare dhe këngëtare. Zhao Feiyan kishte një talent shumë të madh muzikor dhe zotëronte një mjeshtëri të shkëlqyeshme në këndim dhe vallëzim.

Një ditë, veshur me rroba të zakonshme, perandori Han Chengdi erdhi në shtëpinë e princeshës Yanga. Princesha urdhëroi valltaret dhe këngëtaret e saj për ta argëtuar perandorin. Sytë tërheqës, zëri i ëmbël dhe kërcimi i mrekullueshëm i Zhao Feiyan-it e pushtuan plotësisht zemrën e perandorit Han Chengdi. Prandaj ai e mori Zhao Feiyan-in si konkubinën e vet.

Bukuria e spikatur, trupi i hollë dhe mjeshtëria e dallueshme në vallëzim e Zhao Feiyan-it siguruan pozitën e saj ndër qindra konkubinat e Han Chengdi-së. Kur luante vallet e veta të veçanta, luhatja e duarve të saj dukej si lëkundja e luleve nga puhiza, lëvizja e trupit të saj të hollë dukej si fluturimi i dallëndyshes në fllad. Vallet e veçanta të Zhao Feiyan-it ia rrëmbyen zemrën perandorit Han Chengdi. Ai urdhëroi shërbyeset e tjera të mbanin një pjatë kristali, mbi të cilën Zhao Feiyan-i të kërcente. Vallëzimi i bukur i Zhao Feiyan-it vlerësohej shumë lart nga kinezët e atëkohshëm. Ata e shprehën mjeshtërinë në kërcim të Zhao Feiyan-it me këto fjalë: "Vallëzim i paparë në të kaluarën dhe që nuk do të përsëritet nga të tjerat në të ardhmen". Vallëzimi mjeshtëror i Zhao Feiyan-it i solli Han Chengdi-së një argëtim të paprovuar më parë prej tij.

Zhao Feiyan-i ishte një femër jo vetëm me bukuri të madhe, por edhe me ide. Për të kontrolluar më tej zemrën e perandorit Han Chengdi, ajo i prezantoi atij motrën e saj të vogël Zhao Hede, një vashë edhe më e bukur. Bukuria dhe ëmbëlsia e Zhao Hede-së e magjepsën tërësisht perandorin. Han Chengdi i dëgjonte plotësisht fjalët e dy motrave. Ato komplotuan kundër perandoreshës Shy (gruaja e parë e perandorit Han Chengdi dhe perandoresha e kurorëzuar ), dhe kështu perandori ia hoqi asaj titullin dhe e bëri Zhao Feiyan-in perandoreshë të re, ndërsa Zhao Hede-në konkubinë të lartë të tij.
Megjithëse fituan dashurinë e plotë të perandorit,  këto dy motra nuk mbetën asnjëherë shtatzëna. Ato kishin frikë të madhe se mos konkubinat e tjera që kishin lindur fëmijë,  rrezikonin pozitën e tyre. Për ta gëzuar këto dy motra, perandori Han Chengdi i robëruar nga bukuria femërore vrau dy bijtë e vet, duke shpërfillur rrezikun e mungesës së trashëgimtarit të fronit perandorak.

Pas vdekjes, perandori Han Chengdi nuk kishte ndonjë djalë të cilit t'ia linte fronin. Meqë perandoresha Zhao Feiyan e ndihmoi nipin e Han Chengdi-së Liu Xin për marrjen e fronit perandorak, perandori i ri Han Shuaidi e shpërbleu Zhao Feiyan-in për ndihmën që i kishte dhënë duke e nderuar me titullin "Nëna perandoreshë". Por pas 6 vjetësh vdiq edhe Han Shuaidi. Ministri i mbrojtjes i atëkohshëm Wang Mang e detyroi Zhao Feiyan-in të vetëvritej për shkak të përfshirjes në krimin e vrasjes së bijve të perandorit.

Zhao Feiyan mund të ketë qenë valltarja më e mirë në Kinën e lashtë. Karakteristikë e bukurisë së saj ishte trupi i hollë. Por në dinastinë Tang, kishte një konkubinë tjetër shumë të bukur, Yang Yuhuan, me trup të madh. Prandaj në një poemë kineze ka një varg klasik që i përshkruan kështu stilet e ndryshme të bukurisë femërore: "Zhao Feiyan e hollë dhe Yang Yuhuan e bëshme".