foto nga VCG

Ministri i Jashtëm kinez Wang Yi tha të martën se popujt e Kinës dhe të Rusisë dhanë kontribut të rëndësishëm në fitoren e Luftës Antifashiste Botërore. 

Në një intervistë për grupin mediatik rus "Russia Today" në Moskë, Wang, që është gjithashtu një anëtar i Byrosë Politike të Komitetit Qendror të Partisë Komuniste të Kinës, vuri në dukje që ky vit shënon 80-vjetorin e fitores së Luftës së Rezistencës të Popullit Kinez kundër Agresionit Japonez, Luftës së Madhe Patriotike të Bashkimit Sovjetik dhe Luftës Antifashiste Botërore.

Në betejën ndërmjet së drejtës dhe së keqes, Kina dhe Rusia ishin fushëbetejat kryesore përkatësisht në Azi dhe Evropë, dhe populli kinez e populli rus ishin dy forcat kryesore në rezistencën ndaj fashizmit e militarizmit, theksoi Wang.

Mbi bazën e fitores së madhe të Luftës së Dytë Botërore, Kina dhe Rusia, së bashku me anëtarët e tjerë kyç të aleancës antifashiste, nisën së bashku themelimin e Kombeve të Bashkuara, bashkëhartuan Kartën e OKB-së dhe kontribuuan në një sërë dokumentesh të rëndësishme ndërkombëtare që hodhën themelet për rendin modern ndërkombëtar dhe vendosën normat bazë të marrëdhënieve ndërkombëtare bashkëkohore, shtoi ai.

Wang u bëri thirrje të dy vendeve që të qëndrojnë me vendosmëri në anën e drejtësisë ndërkombëtare përballë ndryshimeve të mëdha të papara në një shekull, të mbrojnë së bashku me të gjithë popujt paqedashës anembanë botës historinë e shkruar me gjak dhe të kundërshtojnë çdo përpjekje a veprim për të mohuar, shtrembëruar ose rishikuar historinë e Luftës së Dytë Botërore. 

Ai shtoi që të dy vendet duhet të ruajnë rendin ndërkombëtar të pasluftës, ta shfrytëzojnë 80-vjetorin e Kombeve të Bashkuara si një mundësi për të përkrahur autoritetin dhe statusin e kësaj organizate, të praktikojnë multilateralizmin e vërtetë dhe të promovojnë respektimin e qëllimeve e të parimeve të Kartës së OKB-së nga të gjitha vendet.

Wang theksoi gjithashtu nevojën për të mbrojtur një multipolarizim të barabartë dhe të rregullt, për të shtuar bashkëpunimin në platformat shumëpalëshe, si Organizata e Bashkëpunimit të Shangait dhe BRICS-i, për të forcuar zërin e fuqishëm të unitetit dhe vetëmbështetjes të Jugut Global e për të marshuar drejt qëllimit të një bashkësie me të ardhme të përbashkët për njerëzimin.