Foto nga ATSH

Duke filluar prej 1 prillit, nis zbatimi i procedurave të reja ICS2 për hyrjen e mallrave në BE, i cili zëvendëson sistemin ekzistues ICS1, shkruan “RTSH”.

Eksportuesit shqiptarë duhet të përshtaten me rregullat e reja dhe të komunikojnë me partnerët e tyre në BE për të shmangur pengesat në transportin e mallrave.

Sipas rregullores se re, operatorët e biznesit do të duhet të dorëzojnë Deklaratën Përmbledhëse të Hyrjes për çdo mall të transportuar, drejt ose përmes BE-së përpara mbërritjes së tij.

Operatorët duhet gjithashtu të bëjnë njoftimin e mbërritjes në zyrën e parë doganore të hyrjes dhe të paraqesin mallrat për inspektim.

Sistemi i ri i Bashkimit Europian synon të rrisë sigurinë e mallrave që hyjnë në BE duke aplikuar një procedurë doganore të standardizuar, për të gjitha mënyrat e transportit, përfshirë transportin rrugor, hekurudhor e ajror.

Sistemi i ri do të përmirësojë aftësinë e BE-së për të parandaluar dhe luftuar kundërvajtjet doganore si dhe duke siguruar një mjedis tregtar më të sigurt.