Një dron po ndihmon në pjalmim të luleve të dardhave, qytet Cangzhou, provincë Hebei, Kinë Veriore/VCG

Gjatë kësaj pranvere, teknologjia dhe pajisjet digjitale-inteligjente të përparuara, po ndihmojnë bujqërit kinezë të lehtësojnë proceset e punimit të tokës.

Dardha është pema e dytë frutore më e popullarizuar në provincën Jiangsu të Kinës Lindore. Deri në vitin 2023, sipërfaqja e mbjellë në të gjithë provincën ishte afërsisht 400.000 mu (një hektar është sa 15 mu), me një prodhim vjetor prej më shumë se 600.000 tonësh. Por lulet e dardhës lulëzojnë vetëm për shtatë ditë, ndaj fermerët duhet të garojnë me kohën për të përfunduar proceset.

Këtë vit, në kopshtet lokale të dardhave erdhi një grup "asistentësh" inteligjentë.

Në të kaluarën, fermerët e frutave mbanin "furça" të bëra vetë dhe ngjiteshin në shkallë për të pjalmuar lulet e dardhës. Një njeri mund të mbaronte një mu toke për 6 orë. Për pemët e vjetra 7-8 metra të gjata, duheshin tre ditë që një person të mbaronte një mu. Kjo punë jo vetëm kërkonte kohë dhe mundim,  por gjithashtu përbënte një rrezik sigurie për shkak të qëndrimit për një kohë të gjatë në shkallë.

Aktualisht, teknologjia e pjalmimit me dron, e ka ndryshuar plotësisht situatën. Në kopshtet e dardhave në Zhenjiang të provincës Jiangsu, dronët fluturojnë mbi pemët frutore dhe mund të kryejnë detyrën e pjalmimit të 10 mu tokë çdo 20 minuta, duke kursyer më shumë se 90% të punës së njeriut. Aktualisht, teknologjia e pjalmimit me dron është promovuar në Korla të Rajonit Autonom Xinjiang-Ujgur dhe në krahina të Kinës Verilindore. Sidomos në rajonet veriore me klimë të thatë dhe periudhë të paqëndrueshme të çeljes së luleve, kjo teknologji mund të ndihmojë fermerët të kapin kohën e kultivimit dhe të sigurojnë rendiment.

Një model i bujqësisë inteligjente që përdoret në provincën Jiangsu/VCG

Përveç dronit për pjalmim, një robot i vogël i quajtur "Platforma e matjes së parametrave të tokës në kohë reale" po punon qetësisht te rrënjët e dardhave në disa kopshte në këtë provincë. Ai mund të lëvizë në mënyrë autonome në pemishte, duke mbledhur të dhëna si temperatura, lagështia, vlera EC, vlera e pH të tokës deri në 60 centimetra thellësi. Këto të dhëna mund të pasqyrojnë përmbajtjen e lëndëve ushqyese të azotit, fosforit dhe kaliumit në tokë. Ato mund të ofrojnë një bazë shkencore për fekondim të saktë dhe menaxhim inteligjent duke u bërë një mbështetje e rëndësishme për modernizimin e pemishteve. Krahasuar me sensorët tradicionalë që kanë një kosto të lartë dhe mbulim të pamjaftueshëm, ky robot mund të mbledhë të dhëna nga e gjithë pemishtja deri disa herë gjatë sezonit të rritjes së pemëve frutore, duke përpiluar me shpejtësi një "recetë" për përmirësimin e tokës.

Në Parkun Demonstrativ të Shkencës dhe Edukimit të Bujqësisë Moderne të Universitetit Yangzhou të provincës Jiangsu, dronët po mbledhin të dhënat e lagështisë së tokës dhe rritjes së fidanëve të grurit në kohë reale, nëpërmjet 17 sensorëve në tokë. Zonat e kuqe që shfaqen në ekranin e pajisjes, tregojnë se kulturat janë në një gjendje të rëndë thatësire. E verdha tregon se janë në një gjendje të butë thatësire, që do të thotë se duhet të ujiten në shkallë të ndryshme. Ndërsa, zona e gjelbër tregon se gjendja e lagështisë së kulturave është e mirë. Ky sistem bujqësor inteligjent, përveç kontrollit të lagështisë tokësore, mund të mbikëqyrë edhe rritjen e kulturave apo gjendjen e krimbave të dëmshëm.

Me këtë sistem, përdorimi i plehrave mund të kursehet deri në 32% dhe rendimenti mund të rritet me 7%. Sidomos plani kohor për kontrollin  e krimbave të dëmshëm, mund të shkurtohet nga shtatë ditë në 48 orë, gjë që ka rëndësi të madhë për korrjet verore.

Më 18 mars, një ekip studimor i Universitetit Yangzhou po punonte në fermën bujqësore Baoying. Një makinë ishte duke lëvruar dheun dhe po groposte kashtë të mbetur në tokë nga sezoni i mëparshëm. Pas nisjes së makinës, kashta u gropos. Sipërfaqja e shtratit ishte shumë e sheshtë dhe cilësia e thyerjes apo gërmimit të dheut ishte shumë e lartë. Sipas studimit, sasia e kashtës së orizit e thyer dhe e groposur në fushë, mund të rrisë përshkueshmërinë e tokës dhe është shumë e dobishme për zhvillimin e rrënjëve të bimëve, gjë që mund të rrisë rendimentin.

Një makinë e pajisur me sistemin e navigimit Beidou po mbjell fildan orizi, qytet Xinghua, provincë Jiangsu, qershor 2024/VCG

Gjithashtu, në fermat e mëdha, për shkak se toka bujqësore nuk është e sheshtë dhe nuk ka pothuajse asnjë objekt referimi, është e vështirë për makineritë bujqësore tradicionale që drejtohen nga njerëzit, të ecin në një vijë të drejtë. Por mbjelljet e drejta janë të favorshme për menaxhim të mëvonshëm dhe ngritjen e efektishmërisë së përdorimit të tokës. Tani, sistemi i navigimit Beidou i Kinës, është vënë në përdorim për të dhënë ndihmë.

Makineria e lëvrimit dhe e mbjelljes, e pajisur me sistemin e navigimit Beidou, mund të planifikojë saktësisht hartën e punës, duke kryer njëherësh detyra si aplikimi i plehrave bazë, lëvrimi, thërrmimi i tokës, ngjeshja, shtypja e brazdës së farës, mbjellja, mbulimi i tokës apo ngjeshja dytësore, gjë që do të thjeshtojë procesin e mbjelljes.

Që nga viti i kaluar, provinca Jiangsu ka krijuar një sërë projektesh pilot të integruara për kërkimin, zhvillimin, prodhimin, promovimin dhe aplikimin e makinerive inteligjente bujqësore. Mes tyre, projektet e robotit kositës dhe robotit korrës, priten të arrijnë prodhim masiv deri në fund të vitit. Praktikimi i këtyre teknologjive, jo vetëm mund të kursejë fuqinë punëtore dhe të zvogëlojë intensitetin e punës së fermerëve, por gjithashtu siguron një prodhim të qëndrueshëm dhe rritje të ardhurash në kushtet e ndryshimit të klimës.

Më shumë teknologji dhe pajisje inteligjente po përhapen në krahina të ndryshme të Kinës, për të ngritur forcat prodhuese cilësore bujqësore të vendit.

Makina mbjellëse e patateve/CMG

Në qytezën Qibu të qytetit Ningde, provinca Fujian e Kinës Jugore, bujqërit po përdorin makinat mbjellëse në tokë. Hapësi pret në tokë për të krijuar një brazdë. Pajisja e transportit hedh në mënyrë të barabartë farat e patateve. Më pas makina e shtyn shpejt tokën për ta mbuluar atë. I gjithë procesi është i qetë dhe efikas.

Linjë e prodhimit inteligjent automatik të fildanëve /CMG

Në një fabrikë fidanishte në Jiangtang të qytetit Jinhua në provincën Zhejiang  të Kinës Lindore, tre linja prodhimi inteligjent automatik të fidanëve, po funksionojnë me kapacitet të plotë. Procese të tilla si përhapja e dheut, mbjellja e farave dhe nxjerrja e fidanëve mund të përfundojnë brenda 30 sekondave. 240 mijë tabaka me fidanë mund të prodhohen në një ditë, të mjaftueshme për të mbuluar 800 mu tokë orizi.

Roboti për shartim/CMG

Në qytetin Tongxiang të provincës Zhejiang, roboti përfundon të gjithë procesin e shartimit në vetëm tre sekonda. Ky robot mund të realizojë shartim automatik dhe të saktë të domateve, specave dhe fidanëve të tjerë, duke shartuar 500-700 bimë në orë, me një shkallë mbijetese prej 99%.