Ambasadori i Shqiperise ne Kine (Foto Facebook Ambasada e Shqiperise ne Kine)

Ambasadori i Shqipërisë në Kinë, Riza Poda, priti në zyrën e tij përfaqësuesen speciale të Sekretariatit të Bashkëpunimit të Mekanizmit Kinë-VEQL, ambasadoren Jiang Yu.

Takimi u zhvillua me kërkesën e ambasadores Jiang, e cila i uroi mirëseardhjen ambasadorit Poda, duke shprehur besimin se marrëdhëniet dypaleshe midis Shqipërisë dhe Kinës do të intensifikohen dhe zhvillohen më tej gjatë mandatit të tij, thuhet në një njoftim zyrtar të Ambasadës së Shqipërisë në Kinë.

Ambasadori Poda theksoi se thellimi dhe rritja e bashkëpunimit në të gjitha fushat midis dy vendeve do të jenë në fokus kryesor të punës së tij.

Ai vuri në dukje rritjen e numrit të turistëve dhe shkëmbimeve njerëzore, si dhe nevojën për vendosjen e një linje fluturimi ajrore direkte midis Kinës dhe Shqipërisë. Nëse kjo nuk është e mundur për momentin, ambasadori Poda propozoi fillimin e fluturimeve “charter”, veçanërisht gjatë sezonit veror.

Takimi u përqendrua në mundësitë për zgjerimin e bashkëpunimit ekonomik, kulturor dhe turistik midis dy vendeve, duke vënë në dukje potencialin e madh për zhvillimin e mëtejshëm të marrëdhënieve dypalëshe.