Kentina Shehaj gjatë videoklipi të saj të fundit Të Dua
Këngëtarja e re e baladave, por edhe e muzikës ritmike Kentina Shehaj e ka nisur muzikën në moshën 14 vjeçare. E lindur në Tiranë, ajo ka marrë pjesë në disa kompeticione muzikore, në festivale fëmijësh, për të vijuar në moshën 17 vjeçare me prezantimin e saj në edicionin e fundit të festivalit “Top Fest” me këngën “Të përket”, si dhe te “Kënga Magjike” në vitin 2015 me këngën “Parajsa e mëkatarëve”.
Kentina pati një shkëputje muzikore për disa vite, për t’ju kushtuar studimeve të larta në degën e Arkitekturës, ndërsa momentalisht po ndjek studimet në degën Financë -Bankë. Pavarësisht se nuk ka marrë pjesë në kompeticionet muzikore kohët e fundit, ajo nuk është ndarë asnjëherë nga muzika, pasi herë pas here ka interpretuar muzikë live në piano-bare, apo në koncerte të ndryshme në vend. Edhe pse nuk ka realizuar krijime të reja, ajo kohët e fundit realizon covera të shkurtra të këngëve të njohura, ku e fundit është kënga “Gurbeti”. Në intervistë për Radio Ejani, Kentina na tregon për tre profesionet e saj, arkitekturën, financën dhe muzikën, që do e shoqërojnë gjatë jetës së saj.
Këngëtarja Kentina Shehaj
CMG: Kentina ti momentalisht interpreton live në piano-bare apo koncerte. Sa kohë ke që interpreton muzikë live?
Kentina Shehaj: Me muzikën live kam filluar të këndoj rreth 7-8 vite më parë. Kjo është një mënyrë mjaft e mirë sepse më ndihmon të mbaj mirë zërin, por gjithashtu më ndihmon që të njihem me njerëzit nga afër. Kur realizon një videoklip, nuk e merr dot direkt impaktin e publikut, ndërsa kur këndon live, e merr direkt pëlqimin e publikut dhe janë emocione shumë të bukura këto për mua dhe më bëjnë të ndjehem më mirë.
CMG: Fama fitohet më shpejt kur publikon një këngë, një videoklip, apo gjatë interpretimeve live?
Kentina Shehaj: Këto mendoj se bashkangjiten të dyja. Unë nuk jam ndonjë fanse e famës së zjarrtë, që mos të kem mundësi të bëj një jetë private. Mendoj se kur realizon videoklipe, të njohin njerëzit, por interpretimi live të ndihmon e të afron pranë tyre, kështu që mendoj se shkojnë të dyja bashkë.
CMG: Ke patur shkëputje herë pas here nga realizimi i këngëve të reja, apo nga kompeticionet e ndryshme. Përse ke zgjedhur të interpretosh vetëm live?
Kentina Shehaj: Unë këndoj live sepse muzika është pasioni im, kam një mundësi të shprehem, t’i gëzoj njerëzit, më pëlqen të bëj njerëzit të lumtur, duke qenë se jam shumë sociale dhe e dashur. Muzika është pasioni im më i madh, interpretimi live më dhuron shumë emocione të bukura dhe patjetër që do ta ndjek deri në fund.
CMG: Si e sheh rrugëtimin tënd artistik, duke parë kujtimet e tua ndër vite?
Kentina Shehaj: Më pëlqen, e shoh çdo vit që unë rritem, kam gjëra më të reja. Më jep ndjesi shumë të mirë fakti që kam përparuar, jam më ndryshe, e kam ndjekur veten në shumë video të viteve më parë dhe ka dallim mjaft të madh. Ndjehem shumë mirë.
Kentina
CMG: Je angazhuar që në festivalet e fëmijëve, e më pas në kompeticione për të rritur. Si e nise muzikën dhe kush e zbuloi talentin tënd?
Kentina Shehaj: Unë kam marrë pjesë që në moshën 14 vjeçare në festivalin e parë për fëmijë, “Perform Fest” asokohe isha me babin tim. Shkuam bashkë në audicion dhe arrita të fitoja. Kam patur fatin që të kisha bashkëpunime live në atë kohë me artistët e mirënjohur Vikena Kamenica, Mariza Ikonomi, Kastriot Tusha, etj. Kam patur fatin e mirë që të këndoj në skenë që në fillimet e mia, gjë e cila më ka ndihmuar për të hequr ndrojtjen. Kam fituar edhe çmime, por më pas pauzat kanë qenë të gjata, ndoshta ky është një gabim që unë ja kam vënë vetes.
CMG: Deri në ato momente nuk kishe marrë mësime muzikore?
Kentina Shehaj: Unë nuk kam studiuar muzikë. Në atë festival, kujtoj që ne bënim prova çdo ditë dhe profesori im në atë kohë Enis Mullaj, që sot është një producent i jashtëzakonshëm, na bënte prova çdo ditë, duke kënduar me piano këngë të ndryshme, që na ndihmonin për hapjen e zërit, që të dilnim sa më mirë në live. Kemi patur një shoqëri shumë të mirë me grupin dhe e ruajnë ende atë shoqëri. Janë Keida, Matiasi, Marko, Rigerta që sot kam ende shoqëri. Duke qenë se unë isha pak më e madhe se ata, kisha pak më shumë përgjegjësi që të kujdesesha për grupin, por ka qenë një nga momentet më të bukura të jetës time ai festival, që unë preka skenën për herë të parë në një pallat kulture dhe ishte një eksperiencë e jashtëzakonshme.
CMG: Pas festivalit të fëmijëve u paraqite në një kompeticion për të rritur, “Top Fest” ku interpretove një baladë.
Kentina Shehaj: Po, ishte “Top Fest”, ishte viti i fundit që bëhej ai festival, ku unë mora pjesë me këngën “Të përket”, ku isha shumë e vogël. Më pas kam vijuar me “Kënga Magjike”, kam marrë pjesë në disa kompeticione, por mendoj se tani ka ardhur koha që t’i futem seriozisht kësaj pune, aq më tepër që tani edhe këndimi live më ka ndihmuar shumë me zërin.
CMG: Nga këngët e tua do të veçoja baladën “Parajsa e mëkatarëve”, por si i ke raportet sot me baladat?
Kentina Shehaj: “Parajsa e mëkatarëve” ka qenë balada ime e parë, e realizuar në mënyrën më perfekte edhe videoklipi i parë gjithashtu. Më kujtohet biseda me kompozitorin i cili më tha: “Kentina, kjo këngë është e zgjedhur, por nëse ti mund ta këndosh si duhet me dy provat e para, kjo këngë është e jotja”. Fatmirësisht unë e fitova këtë këngë, konkurova me të dhe ka qenë një prezantim shumë i mirë, e njerëzit e kanë pritur shumë mirë. Pra hyra në artin e mirëfilltë, që unë të kisha mundësi të njihesha nga njerëzit. Kjo këngë mori pjesë në festivalin “Kënga Magjike”, në atë kohë nuk ishte kategoria “New Artistist”. Gjithçka shkoi shumë mirë, por nuk arrita të shkoja në finale. Kjo gjë nuk më pengoi të vazhdoja më tej.
CMG: Si i ke raportet sot me baladat?
Kentina Shehaj: Baladat janë pjesë e shpirtit tim dhe mendoj se çdo artist kur bëhet fjalë për baladat, kanë një lloj çlirimi, sepse e di që mund të shprehen, mund ta ndjejnë, është i vetmi moment kur ne këndojmë me shpirt dhe me sy mbyllur, besoj se kjo i tregon të gjitha. Jam pjesë e baladave, i këndoj shumë shpesh. Mendoj që edhe në mes të një atmosfere, kur duhet të bëj një pauzë, balada është gjithmonë aty, pra nuk ka pushim për mua me një Dj, por këndoj përherë një baladë sepse më pëlqejnë shumë.
Kentina
CMG: Po vokalit tënd, cili zhanër muzikor i shkon më së shumti?
Kentina Shehaj: Baladat janë të miat, por vokalit tim i shkojnë shumë edhe këngët moderne, por edhe këngët popullore, gjithmonë në bazë të ambjentit dhe krahinave ku këndoj.
CMG: Kentina, përse ke munguar kaq shumë në skenë?
Kentina Shehaj: Kam bërë shumë mungesa, që nuk duhej t’i kisha bërë, por kam qenë më shumë e fokusuar me studimet e mia, më pas udhëtimet, ndoshta e kam e dashur këtë lloj qetësie, për të kuptuar se çfarë dua në të vërtetë. Kjo ka qenë arsyeja, por mendoj se kurrë nuk është vonë për të filluar prapë. Tani unë jam rikthyer për të vazhduar rrugëtimin tim artistik.
CMG: Kohët e fundit ndërsa interpreton edhe muzikë live, ke sjellë edhe disa covera me video, ndër të cilat edhe këngën “Gurbeti”.
Kentina Shehaj: Këngët e vjetra, duke qenë se bëhen më shumë virale dhe çdo këngëtar ka mënyrën e vet si e risjell edhe mua më ka pëlqyer që të sjell këto covera të shkurtra. Mendoj se do vazhdoj ende të realizoj covera, deri në momentin që ta ndjej veten shumë gati për të sjellë një projekt të ri. Mungesa ime ka qenë vetëm në prezantime skenike, apo mungesa e krijimeve të reja, por unë kam qenë gjithmonë pjesë e muzikës live, kudo nëpër Shqipëri dhe vende të ndryshme.
CMG: Çfarë të lidh ty me Kosovën, pasi ke studiuar aty në fillim për Arkitekturë e më pas për Financë?
Kentina Shehaj: Kosova, është një pjesë e shpirtit tim, unë kam kryer universitetin e parë, ndërsa tani po studioj në degën Financë -bankë. Kam patur fatin e mirë që të kem edhe bashkëpunime në Kosovë, të punoj me artistë shumë të mirë, me artistë mjaft të përkushtuar dhe që e vlerësojnë talentin që kam. Jam ndjerë shumë mirë aty, vazhdoj që të kem bashkëpunime me kompozitorë të ndryshëm dhe ndjehem mirë, plus fakti që po ndjek dhe shkollën, jam edhe më e lidhur me të.
Kentina Shehaj
CMG: Si një këngëtare me origjinë nga Shkodra, si është raporti yt me këngët shkodrane?
Kentina Shehaj: Unë jam gjysmë shkodrane. Mami im është nga Shkodra dhe unë duhet t’i di këngët shkodrane, kam raport shumë të mire. Këngët shkodrane më sjellin një energji shumë ndryshe. Janë shumë të bukura, por nuk mbeten pas edhe krahinat e tjera që kanë lezetin e vet. Unë kam lindur dhe jam rritur në Tiranë, ndërsa babai im është nga jugu i vendit. Por më shumë këndoj këngë të krahinës së veriut ose të Shqipërisë së mesme. Nuk mund të them diçka për jugun ekzaktësisht, por nuk e le pas dore, e kemi herë pas here ndonjë projekt muzikor edhe aty.
CMG: Cili do të jetë plani yt më i afërt rreth muzikës?
Kentina Shehaj: Unë jam një njeri që nuk më pëlqen të bëj plane, por kam në kokën time disa gjëra që pres t’i realizoj. Patjetër që kryesorja është që unë të vij me një projekt të ri muzikor shumë shpejt, të mbaroj dhe studimet pasi jam në vitin e fundit, e më pas mendoj se e kam rrugën e lirë për të bërë edhe gjëra të tjera më të bukura se kaq. Pra tani e në vazhdim nuk do të ketë më pauza, ky është i gjithë qëllimi.
Këngëtarja Kentina Shehaj në intervistë për Radio Ejani
CMG: Çfarë të përbashkëte kanë degët që ke zgjedhur, arkitektura, financa dhe muzika?
Kentina Shehaj: Nuk kanë lidhje me njëra -tjetrën, por mua më pëlqen gjithmonë që të bëj gjëra të reja, gjëra që mund të duken të pamundura, t’i bëj të mundura.
CMG: Do jetë e vështirë që t’i menaxhosh të treja në të ardhmen?
Kentina Shehaj: Mendoj se muzika nuk është pengesë, pasi mbrëmjet e live-t mund t’i zgjedh në data të caktuara. Financa është një degë që mua më personalizon me karakterin që kam, me tipin që jam, mendoj se do i menaxhoj të dyja perfekt.
CMG: Çfarë do të shtoje së fundi?
Kentina Shehaj: Do shtoja se, unë nuk do të mungoj më gjatë në muzikë, do jem më afër njerëzve, me projekte të reja të ndryshme dhe pse jo gjithmonë me interpretimet live çdo fundjavë.
Intervistoi: Sava Lena
