Nga  22-24 gusht pranë mozaikut Paleochristian të fshatit Lin, në Pogradec, nën kujdesin e Ministrisë së Kulturës MEKI, u zhvillua edicioni i dytë i Lin Festival. Gjatë këtyre 3 ditëve, vizitorët e shumtë  kryesisht turistë të huaj, por edhe qytetarë nga Pogradeci, Tirana si edhe banorët e fshatit Lin patën mundësinë të ndiqnin aktivitetet e shumta në kuadër të Festivalit si dhe Ekspozitën e Arkivit të shtetit që pasqyronte Kostumet popullore të trevave të ndryshme shqiptare, Panairin e produkteve ushqimore dhe artizanale të fshatit Lin, si dhe zonës përreth, sesionin e kulinarisë së mbajtur nga masterchef Gëzim Musliaka,  i cili u ndoq me interes jo vetëm nga amvisat  e zonës, por edhe të tjerë qytetarë të pranishëm të interesuar. Mbrëmjet u ndezën nga muzika e bukur arbëreshe e mesdhetare si dhe recitimet në gjuhën italiane, vargje të njohura të poetëve shqiptarë dhe italianë, që sollën në skenë projektin “Marecanto”- 5 artistë nga Italia, si dhe artistë tepër të veçantë nga Kosova.

Një moment mjaft i veçantë ishte edhe interpretimi i aktorit Laert Vasili, por mbi të gjitha surpriza e këtij edicioni ishin dhe Dj ndërkombëtarë që sollën shumë ngjyra me performancën e tyre, duke luajtur premierë  remixet e këngëve tona qytetare. Ky festival pati jehonë e impakt pozitiv, jo vetëm në mediat kombëtare, por edhe ato ndërkombëtare, falë angazhimit dhe eventeve promovuese në rajon si, Itali, Kosovë ,Maqedoni, etj, të udhëhequra nga ideatori dhe producenti Altin Tila.

Si risi i këtij edicioni për të promovuar sa më tepër vlerat tona arkeologjike & etno kulturore për një turizëm të qëndrueshëm jo vetëm për fshatin Lin e këtë zonë, por  edhe për të gjithë trojet shqipfolëse. Fshati prehistorik Lin këtë vit shkëlqeu edhe falë kësaj platforme gjithëpërfshirëse vlerash të identitetit tonë kombëtar si Lin Festival, duke motivuar organizatorët edhe për  edicionet e ardhshme.