Foto nga VCG
Të dhënat tregojnë që, në muajin korrik të këtij viti, me zhvillimin e qëndrueshëm dhe cilësor të sektorit industrial, forcat e reja shtytëse të rritjes së ekonomisë në Kinë kanë vazhduar të shtohen, prodhimi industrial ka ruajtur gjendjen e qëndrueshme dhe fitimet e ndërmarrjeve industriale kanë mbajtur prirjen e mëkëmbjes.
Nga të dhënat mund të shohim disa veçanti që po tregojnë ndërmarrjet industriale në Kinë.
Së pari, fitimet kanë shënuar rritje të shpejtë. Në janar-korrik, ndërmarrjet industriale mbi përmasat e përcaktuara (me të ardhura vjetore mbi 20 milionë juanë) u rritën 3.6 % në krahasim me të njëjtën periudhë të vitit 2023, 0.1 pikë përqindjeje më lart se në janar-qershor, duke vazhduar prirjen e mëkëmbjes së qëndrueshme. Nga 41 kategoritë kryesore industriale, 21 kanë shënuar rritje më të shpejtë ose kanë pasur një ulje të ritmeve të rritjes së fitimeve në krahasim me një muaj më parë dhe mbi 50 % kanë shënuar mëkëmëbje. Në korrik, fitimet e ndërmarrjeve industriale mbi përmasat e përcaktuara janë rritur 4.1 % në krahasim me të njëjtin muaj të një viti më parë dhe 0.5 pikë përqindjeje më shumë se në qershor.
Foto nga VCG
Së dyti, të ardhurat e ndërmarrjeve industriale kanë shënuar rritje të qëndrueshme. Me mëkëmbjen e qëndrueshme të kërkesave në treg, është përmirësuar lidhja e prodhimit dhe shitjes e të ardhurat e ndërmarrjeve industriale kanë pasur rritje të qëndrueshme. Në janar-korrik, të ardhurat e ndërmarrjeve mbi përmasat e përcaktuara u shtuan 2.9 %, njësoj si në janar-qershor. Kjo në fakt ka krijuar kushte pozitive për mëkëmbjen e vazhdueshme të fitimeve të ndërmarrjeve.
Së treti, fitimet janë nxitur nga sektori i prodhimit me teknologji të lartë. Në janar-korrik, fitimet e sektorit të prodhimit me teknologji të lartë u rritën 12.8 %, 9.2 pikë përqindjeje më shumë se niveli mesatar i ndërmarrjeve industriale mbi përmasat e përcaktuara, duke nxitur një rritje me 2.1 pikë përqindjeje në fitimet e këtyre ndërmarrjeve e duke dhënë kontribut për rritjen e fitimeve industriale afro 60 %. Me zhvillimin modern, inteligjent e të gjelbër të sektorit industrial, disa sektorë kanë shënuar rritje të shpejtë. Ndër ta, prodhimi i baterive të litiumit, i pajisjeve të posaçme të gjysmëpërcjellësve dhe i pajisjeve të konsumit inteligjent kanë njohur një rritje përkatësisht 45.6 %, 16 % dhe 9.2 %, duke i dhënë një hov të rëndësishëm nxitjes së zhvillimit me cilësi të lartë të sektorit industrial.
Së katërti, fitimet e sektorit të prodhimit të pajisjeve kanë shënuar rritje të qëndrueshme. Në janar-korrik, fitimet e këtij sektori u shtuan 6.1%, duke dhënë përkrahje të rëndësishme për mëkëmbjen e fitimeve të ndërmarrjeve industriale mbi përmasat e përcaktuara. Struktura e fitimeve industriale është në përmirësim të pandërprerë dhe sektori i prodhimit të pajisjeve zë 35.1 % të ndërmarrjeve industriale mbi përmasat e përcaktuara. Ndër 8 sektorët e sektorit të prodhimit të pajisjeve, gjashtë patën rritje. Sektori i hekurudhave, anijeve, aviacionit, hapësirës ajrore dhe i elektronikës kanë nxitur shtimin e shpejtë të prodhimit, duke ruajtur rritjen të shpejtë qysh prej fillimit të këtij viti dhe duke shënuar rritje të fitimeve përkatësisht me 36.9 % dhe 25.1 %.
Foto nga VCG
Së pesti, prodhimi i mallrave të konsumit ka ruajtur rritjen dyshifrore të fitimeve. Në tregun e brendshëm, kërkesat e konsumit kanë një mëkëmbje të qëndrueshme dhe eksporti i mallrave industriale ka ruajtur rritjen e vazhdueshme. Kjo ka nxitur shtimin e fitimeve në këtë sektor. Në shtatëmujorin e parë të vitit, fitimet nga prodhimi i mallrave të konsumit shënuan rritje 10.2 % në krahasim me të njëjtën periudhë të vitit 2023. 11 ndër 13 kategoritë kryesore të prodhimit të mallrave të konsumit kanë njohur rritje të fitimeve, 8 prej tyre mbi 10 %. Fitimet në sektorët e prodhimit të letrës dhe të fibrave ishin përkatësisht 1.08 herë dhe 1.05 herë më shumë, ndërsa prodhimi i mallrave të konsumit, si ushqimet e produktet bujqësore, tekstilet, printimi, arsimi, pijet dhe orenditë shtëpiake kanë shënuar rritje 12.4 % - 23.9 %.
Statisticieni në Departamentin industrial të Zyrës Kombëtare të Statistikave të Kinës, Yu Weining, u shpreh që këto rritje në fitimet e ndërmarrjeve industriale mbi përmasa kanë treguar një prirje të vazhdueshme mëkëmbëse, por duhet të kuptohet që me gjendjen e ndërlikuar jashtë vendit dhe kërkesën ende jo të fortë brenda, duhet të vazhdojë të konsolidohet baza e mëkëmbjes së fitimeve industriale.
Foto nga VCG
“Në të ardhmen, duhet të zbatohen në mënyrë të vendosur vendimet e plenumit të 3-të të Komitetit të 20-të Qendror të Partisë Komuniste të Kinës, të zgjerohet më fuqimisht kërkesa e brendshme dhe të merren masa të posaçme për funksionimin e mbarë të ekonomisë dhe për zbatimin e detajuar të reformave, duke nxitur më tej zhvillimin industrial me forca të reja prodhuese cilësore dhe duke forcuar pandërprerë prirjen pozitive të mëkëmbjes industriale dhe ekonomike,” theksoi Yu. (Jiang Lei)
