Foto nga VCG
Këtë javë, Këshilli i Shtetit i Kinës miratoi në mbledhjen e vet dokumentin mbi nxitjen e zhvillimit cilësor të tregtisë së shërbimeve me hapje të nivelit të lartë dhe versionin e vitit 2024 të masave të posaçme të kontrollit mbi hyrjen e investimeve të huaja (lista negative).
Në mbledhjen e Këshillit të Shtetit është vënë në dukje që përshpejtimi i zhvillimit të tregtisë së shërbimeve është një kërkesë e domosdoshme për zgjerimin e hapjes me nivel të lartë dhe për gjallërinë e re të tregtisë së jashtme. Duhet të ngrihet niveli i liberalizimit e lehtësimit të tregtisë së shërbimeve, të zbatohet në mënyrë të gjithanshme lista negative mbi tregtinë e shërbimeve ndërkufitare, të zgjerohen pikat eksperimentale për hapjen e sektorit të shërbimeve dhe të nxitet lëvizja ndërkufitare e burimeve, si talentet, fondet, arritjet teknologjike dhe të dhënat. Duhet të nxitet zhvillim inovativ i fushave kryesore të tregtisë së shërbimeve, të nxitet integrimi i tregtisë së shërbimeve dhe tregtisë së mallrave, të mbështetet zhvillimi ndërkombëtar i shërbimeve profesionale, si financimi, këshillimi, dizenjimi e certifikimi, dhe të eksplorohen pikat e reja të rritjes në tregtinë e shërbimeve.
Në këtë mbledhje u vu në dukje që do të lehtësohet më tej hyrja e investimeve të huaja në tregun vendës, do të anulohen në mënyrë të gjithanshme masat kufizuese ndaj hyrjes së investimeve të huaja në sektorin e prodhimit dhe do të nxitet shpejt hapja në sektorët e telekomunikacionit, arsimit e shëndetësisë. Gjithashtu, do të përmirësohen masat dhe politikat për tërheqjen e investimeve të huaja, do të bëhet reagim në kohë ndaj kërkesave e akuzave të arsyeshme të investitorëve të huaj dhe do të publikohen më shumë masa praktike për përmirësimin e mjedisit të biznesit dhe të shërbimeve përkatëse.
Foto nga VCG
Studiuesi i Institutit të Kontraktimit të Palëve të Treta pranë Ministrisë së Tregtisë të Kinës, Zheng Wei, u shpreh që zbatimi i gjithanshëm i listës negative të tregtisë së shërbimeve ndërkufitare është një masë e rëndësishme e Kinës për hapjen sistemore në tregtinë e shërbimeve dhe përbën një provë konkrete që Kina po zgjeron në mënyrë të qëndrueshme hapjen sistemore. Një gjë e tillë do të ngrejë në mënyrë të dukshme nivelin e hapjes dhe të lehtësimit të tregtisë. Ajo shënon jo vetëm një provë pozitive për modelin e menaxhimit tregtar, por është edhe në të mirë të hapjes më të gjerë dhe më të thellë të Kinës, duke e ndihmuar Kinën të integrohet me nivelin e lartë ndërkombëtar të menaxhimit në këtë fushë.
Përveç listës negative, në këtë mbledhje është theksuar edhe zgjerimi i pikave eksperimentale për hapjen e sektorit të shërbimeve. Për këtë, studiuesi Zheng Wei mendon që masat nxitëse në lëvizjen e burimeve, si talentet, fondet, arritjet teknologjike e të dhënat, si edhe masat e reja për zhvillimin inovativ të fushave kryesore të sektorit të shërbimeve, do të krijojnë një mjedis më të mirë për zhvillimin e tregtisë së shërbimeve dhe janë në favor të krijimit të pikave të reja të rritjes së tregtisë së shërbimeve.
Lidhur me listën negative për hyrjen e investimeve të huaja, Zheng analizon që vendimi i marrë në këtë mbledhje pa dyshim që do të krijojë kushte më të mira për sektorin e prodhimit dhe do të zgjerojë mundësitë e investitorëve të huaj. Lidhur me listën negative, ku përfshihen shumë pika për sektorin e shërbimeve, në mbledhjen e Këshillit të Shtetit është theksuar që të nxitet shpejt hapja e shërbimeve, si në telekomunikacion, arsim e shëndetësi, duke përfshirë edhe disa sektorë sensitivë. Kjo në fakt tregon vendosmërinë e Kinës për hapje me botën e jashtme.
Foto nga VCG
“Në të ardhmen, parashikojmë që do të shpallen më shumë masa konkrete për të nxitur hapjen e këtyre shërbimeve, çka do të shtojë më tej besimin e investitorëve të huaj te tregu kinez,” analizon Zheng Wei.
(Jiang Lei)
