Foto nga VCG
Në plenumin e 3-të të Komitetit të 20-të Qendror të Partisë Komuniste të Kinës u miratua Rezoluta e Komitetit Qendror të PKK-së për Thellimin e Mëtejshëm të Reformës në Mënyrë të Gjithanshme për të Çuar Përpara Modernizimin Kinez. Në këtë dokument theksohet që duhet këmbëngulur me vendosmëri në politikën bazë shtetërore të hapjes dhe në nxitjen e reformave nëpërmjet hapjes, dhe në bazë të epërsisë së tregut gjigant të Kinës, të shtohet aftësia e hapjes nëpërmjet zgjerimit të bashkëpunimit ndërkombëtar dhe të ndërtohet sistemi i ri ekonomik me hapje me nivel më të lartë.
Në këtë dokument janë përfshirë masat kryesore për zgjerimin e hapjes, si shtimi i hapjes institucionale, thellimi i reformave në sistemin e tregtisë së jashtme, thellimi i reformave në sistemin e menaxhimit të investimeve të huaja dhe investimeve jashtë vendit, zgjerimi i hapjes rajonale dhe përmirësimi i mekanizmit mbi ndërtimin e përbashkët të “Një brez, një rrugë”.
Foto nga VCG
Ndër këto masa, puna kryesore për fazën tjetër të hapjes është shtimi i qëndrueshëm i hapjes institucionale.
Në dokumentin e miratuar nga plenumi i tretë është përmendur qartë integrimi në mënyrë aktive me rregullat ndërkombëtare tregtare me standard të lartë dhe përputhja me rregullat e standardet në fusha që përfshijnë mbrojtjen e të drejtave të pronësisë intelektuale, subvencionet industriale, standardet mjedisore, mbrojtjen në punë, prokurimet qeveritare, tregtinë elektronike dhe sektorin financiar, për të formuar një mjedis institucional transparent, të qëndrueshëm e të parashikueshëm.
Studiuesja e Institutit të Ekonomisë dhe Politikës Botërore pranë Akademisë së Shkencave Shoqërore të Kinës, Pan Yuanyuan, u shpreh: “Përveç mbrojtjes në punë, prokurimeve qeveritare dhe tregtisë elektronike, në këtë rezolutë të plenumit është përmendur përputhja dhe integrimi me rregullat ndërkombëtare edhe për sa u përket subvencioneve industriale, standardeve mjedisore dhe mbrojtjes së të drejtave të pronësisë intelektuale.”
Foto nga VCG
Studiuesja e Institutit të Kërkimeve të Ministrisë së Tregtisë, Nie Pingxiang, është e mendimit që posaçërisht në sektorët ku ka interes nga ndërmarrjet e huaja, në fazën tjetër do të bëhet integrimi në mënyrë të gjithanshme me standardet dhe rregullat ndërkombëtare të nivelit të lartë, siç është mbrojtja e të drejtave të pronësisë intelektuale, që paraqitet për herë të parë. Kjo mbrojtje është jo vetëm për pronat materiale, por edhe ato jomateriale, si njohuritë dhe pronësia intelektuale.
Fakti është që në zonat pilot të tregtisë së lirë është hartuar lista e parë negative në historinë e Kinës. Krahas kësaj, kanë nisur të vihen në zbatim masat e para konkrete, si shërbimi i unifikuar dhe llogaria e tregtisë së lirë. Të gjitha këto janë pasqyra të përpjekjeve të Kinës për integrimin me rregullat e standardet e larta të tregtisë ndërkombëtare.
Lidhur me hapjen e nivelit të lartë, ministri i Tregtisë i Kinës Wang Wentao u shpreh që, në epokën e re, hapja me nivel të lartë në fakt është shfrytëzimi i rasteve për hyrjen në marrëveshjet tregtare të Partneritetit të Gjithanshëm dhe Progresiv të Trans-Paqësorit (CPTPP) dhe Marrëveshjes së Partneritetit të Ekonomisë Digjitale (DEPA), ndërtimi i sistemit të ri ekonomik me hapje më të lartë dhe formimi i mekanizmave të rregullt që lidhen me rregullat ndërkombëtare. Gjatë këtij procesi, do të krijohet epërsia e re e hapjes dhe do të çlirohen përfitimet e reja të hapjes.
Foto nga VCG
Lidhur me reformat mbi sistemin e tregtisë së jashtme, në këtë dokument të plenumit është paraqitur qartë që të thellohen reformat në sistemin tregtar dhe reformat mbi sistemin e menaxhimit të investimeve të huaja e investimeve jashtë vendit.
Për përmirësimin e sistemit tregtar, duhet të forcohen së pari tre shtyllat kryesore të tregtisë, të cilat janë tregtia e mallrave, tregtia e shërbimeve dhe tregtia digjitale.
Për tregtinë e mallrave, Kina do të eksplorojë aktivisht pikat e reja të rritjes në tregtinë e mallrave të ndërmjetme dhe tregtinë e gjelbër. Në tregtinë e shërbimeve, do të zbatohet në mënyrë të gjithanshme lista negative për tregtinë ndërkufitare të shërbimeve dhe do të zgjerohen pikat eksperimentale e pilot të hapjes në sektorin e shërbimit. Në tregtinë digjitale, do të përshpejtohet digjitalizimi i zinxhirit tregtar dhe do të nxitet ndërtimi i zonave eksperimentale të tregtisë elektronike ndërkufitare. (Jiang Lei)
