Foto nga VCG
Ditët e fundit janë publikuar të dhënat mbi prodhimin e brendshëm bruto (GDP) të Kinës në gjashtë muajt e parë të vitit 2024. Nga ana e vëllimit të përgjithshëm, provincat Guangdong dhe Jiangsu renditen në vendet e para, kurse nga ana e rritjes, Mongolia e Brendshme kryeson me 6.2 %. Ndërsa nga të dhënat për qytetet, Shangai dhe Pekini zënë dy vendet e para, me përkatësisht mbi 2.2 trilionë dhe 2.1 trilionë juanë.
Lidhur me vëllimin e përgjithshëm të GDP-së, provincat e fuqishme ekonomike, si Guangdong, Jiangsu dhe Shandong, janë renditur në tre vendet e para, kurse vendet nga 4 deri në 10 zihen përkatësisht nga provincat Zhejiang, Henan, Sichuan, Hubei, Fujian, Hunan dhe Anhui.
Foto nga VCG
Guangdong dhe Jiangsu kanë vazhduar të mbajnë vendet e tyre në “klubin e 6 trilionë juanëve”, me përkatësisht mbi 6.52 trilionë dhe mbi 6.33 trilionë juanë.
Sipas Zyrës së Statistikave të Guangdong-ut, në gjashtëmujorin e parë të vitit, sektorët me gjallëri të re kinetike kanë pasur zhvillim të shpejtë dhe sektorët e prodhimit modern e të prodhimit me teknologji të lartë shënuan rritje përkatësisht me 8.1 % dhe 13 %. Ndër to, prodhimi i pajisjeve elektronike të nivelit të lartë shënoi rritje me 16.3 % dhe prodhimi i pajisjeve të aviacionit dhe hapësirës ajrore u rrit me 20.9%. Prodhimi i produkteve të teknologjisë të lartë ka pasur rritje të dukshme. Makinat me energji të re, smartfonat, qarqet e integruara dhe robotët industrial kanë njohur rritje përkatësisht me 25.7 %, 23.4 %, 31.1 % dhe 37.6 %.
Një zyrtar në Zyrën e Statistikave të provincës Jiangsu përmendi që në gjashtë muajt e parë të sivjetshëm, industria e Jiangsu-së ka ruajtur rritjen e shpejtë dhe vlera e shtuar industriale shënoi rritje me 7.4 % në krahasim me një vit më parë, duke kontribuuar për 2.9 pikë përqindjeje të rritjes ekonomike. Ndër to, vlera e shtuar e sektorit industrial ishte 7.1 % më shumë se në gjashtëmujorin e parë të vitit 2023, duke nxitur rritjen ekonomike me 2.6 pikë përqindjeje. Krahas këtyre, sektori i shërbimit ka pasur rritje të qëndrueshme. Sektori i shitjes me pakicës dhe shumicë, i transportit e postës, i dhënies me qira dhe i shërbimeve komerciale e civile kanë shënuar rritje përkatësisht me 8.5%, 8.6%, 10.9% e 12.4%, duke nxitur totalisht rritje ekonomike me 1.7 pikë përqindjeje.
Foto nga VCG
Të dhënat fillestare nga Zyra Kombëtare e Statistikave e Kinës tregojnë që në gjashtëmujorin e parë, GDP-ja kombëtare arriti mbi 61.68 trilionë juanë, 5 % më shumë se në gjashtë muajt e parë të vitit 2023.
16 rajone kanë shënuar rritje më të madhe se mesatarja kombëtare. Ndër to, Mongolia e Brendshme u rendit në vendin e parë me 6.2 %, ndërsa Chongqing-u dhe Tibeti zënë së bashkë vendin e 2-të me 6.1 %.
Siç mësohet, Mongolia e Brendshme ka pasur rritje me 12 % sa u përket invetimeve në pasuritë fikse, më shumë se 8.1 %, që është niveli mesatar i vendit. Investimet në industritë parësore, dytësore dhe tretësore kanë shënuar rritje përkatësisht me 77 %, 13.3 % e 4 %.
Foto nga VCG
Për gjashtëmujorin e parë, zëdhënësi i Zyrës Kombëtare të Statistikave u shpreh para mediave që në këtë periudhë, mjedisi i jashtëm është bërë më i ndërlikuar, më serioz e më i paqartë dhe struktura e brendshme ka pasur rregullim të vazhdueshëm dhe të thellë. Përpara këtyre sfidave, po formohen edhe elementet mbështetëse, si efektet e përkrahjes me anë e makropolitikave, mëkëmbja e kërkesës dhe forcat e reja prodhuese inovative. “Ekonomia kombëtare kineze në gjashtë muajt e parë të vitit 2024 ka vazhduar prirjen pozitive dhe ka pasur një zhvillim të qëndrueshëm, gjë që është një arritje jo e lehtë,” theksoi zëdhënësi. (Jiang Lei)
