Foto nga VCG
Të dhënat doganore tregojnë që, në gjashtëmujorin e parë të vitit 2024, tregtia e jashtme e Kinës ka ruajtur rritjen e përgjithshme dhe struktura e tregtisë kineze është përmirësuar më tej. Analistët janë të mendimit që kjo është për arsye të mëkëmbjes së tregut ndërkombëtar, zinxhirit të plotë të Kinës në prodhim e furnizim dhe efekteve që po shfaqin gradualisht politikat tregtare në ekonominë e 2-të më të madhe të botës.
Portet detare janë një dritare e tregtisë së jashtme. Këtë vit, import-eksporti i mallrave i Kinës ka ruajtur prirjen e mirë të rritjes. Qysh prej marsit, import-eksporti e ka mbajtur vlerën mujore mbi 3.5 trilionë juanë. Import-eksporti në gjashtëmujorin e parë për herë të parë i kaloi 21 trilionë juanët dhe vëllimi i përgjithshëm i tregtisë shënoi një rekord të ri.
Krahas përmasave, edhe shpejtësia e rritjes ka ruajtur një prirje të mirë. Në tremujorin e 2-të, import-eksporti u rrit 7.4 % krahasuar me një vit më parë, përkatësisht 2.5 dhe 5.7 pikë përqindjeje më shumë se në tremujorin e parë të sivjetshëm dhe në tremujorin e fundit të vitit të kaluar.
Porti Zhoushan në Ningbo të Kinës Lindore në gjashtëmujorin e parë ka shënuar një vlerë të përpunimit të mallrave prej 708 milionë tonë dhe 19165 mijë kontejnerë standardë. Këto shifra janë përkatësisht 4.2 dhe 8.4 pikë përqindjeje më shumë se në vitin 2023.
Foto nga VCG
Për këtë rritje, drejtori i Universitetit të Liaoning-ut të Kinës Yu Miao u shpreh: “Në gjashtëmujorin e parë, tregtia e jashtme e Kinës shënoi rekord të ri në vëllimin e përgjithshëm të import-eksportit dhe kjo është një arritje e siguruar me vështirësi.”
“Kina ka një zinxhir të plotë prodhimi e furnizimi, kostoja e punës është e ulët, dhe kjo është një epërsi e dukshme. Sivjet ndërmarrjet kineze po e zgjerojnë aktivisht biznesin në tregun ndërkombëtar, po i kushtojnë rëndësi bashkëpunimit me vendet bashkëndërtuese të ‘Një brez, një rrugë’ dhe po eksplorojnë biznesin në ekonomitë e reja. Kjo jo vetëm ka ruajtur rritjen e import-eksportit me tregjet tradicionale, si ASEAN-i, ShBA-ja dhe Koreja e Jugut, por edhe ka sjellë 7.2 % rritje të import-eksportit me vendet pjesëmarrëse në nismën ‘Një brez, një rrugë’. Hapësira e bashkëpunimit tregtar është në zgjerim të vazhdueshëm,” shtoi Yu.
Ndër këto shifra, ajo e eksportit e meriton t’i kushtohet vëmendje. Në gjashtëmujorin e parë, eksportet kineze kapën vlerën e 12.13 trilionë juanëve, 6.9 % më shumë se një vit më parë. “Reuters”-i dhe CNBC-i vlerësojnë që eksporti i Kinës ka pasur “një performancë jashtë parashikimeve”. AFP-ja citon opinionin e një ekonomisti të “Goldman Sachs” që, për arsye të rritjes së kërkesës ndërkombëtare, mallrat kineze kanë konkurrueshmëri jashtëzakonisht të madhe dhe në disa muajt e ardhshëm, eksporti mund të ruajë një prirje të fuqishme.
Përveç rritjes në përmasë, edhe struktura e eksportit është përmirësuar më tej. Krahas mallrave të përditshme, edhe produktet elektronike e mekanike kanë pasur rritje të madhe.
Të dhënat doganore tregojnë që në gjashtëmujorin e parë 2024, eksporti i produkteve elektronike dhe mekanike kapi vlerën 7.14 trilionë juanë, 8.2 % më shumë se një vit më parë, dhe zuri 58.9% të vëllimit total të eksportit.
Foto nga VCG
Ndër produktet elektronike dhe mekanike, pajisjet e përpunimit automatik të të dhënave arritën një vlerë eksporti 683.77 miliardë juanë, ndërsa qarqet e integruara 542.74 miliardë juanë, me një rritje 10.8 % dhe 25.6% krahasuar me një vit më parë. Ndërkohë, eksporti i automjeteve shënoi rritje me 22.2 %, duke kapur vlerën 391.76 miliardë juanë.
Vlen të përmendet që në gjashtëmujorin e parë, edhe prodhimi i anijeve ka pasur një performancë të spikatur në tregun ndërkombëtar. Sipas të dhënave nga Ministria e Industrisë dhe e Teknologjisë së Informacionit e Kinës, deri tani niveli i prodhimit, i porosive të reja dhe i porosive në zbatim në Kinë zë përkatësisht 55 %, 74.7 % dhe 58.9 % të tregut global. Gjithnjë e më shumë ndërmarrje ndërkombëtare po u japin porositë e tyre fabrikave kineze. Në çdo dhjetë porosi të reja në botë, mbi shtatë shkojnë drejt Kinës.
“Rritja e kërkesës ndërkombëtare në sektorin e anijeve po nxit hyrjen e sektorit të prodhimit në një fazë mëkëmbjeje të shpejtë. Për arsye që flotat e anijeve në botë përgjithësisht janë të vjetra dhe ka kërkesë për rifreskim, parashikojmë që eksporti i anijeve nga Kina do të vazhdojë të ruajë një prirje të mirë,” u shpreh zëdhënësi i Dhomës së Tregtisë të Produkteve Elektronike dhe Mekanike të Kinës, Gao Shiwang. (Jiang Lei)
Foto nga VCG
