Flavio Xhaferi prej disa vitesh është valltar pranë Ansamblit të Këngëve dhe Valleve Popullore me të cilin ka marrë pjesë në mjaft aktivitete brenda dhe jashtë vendit, duke përjetuar emocione të veçanta në skenë. Ai ka qenë pjesëmarrës dhe në Festivalin Folklorik të Gjirokastrës, duke debutuar në skenën e kalasë bashkë me pjesëtarë të tjerë të anasmblit popullor. Flavio ka qenë pjesë e mjaft premierave të ansamblit, së fundi solist në koncertin kushtuar valltares së mirënjohur Lili Cingu. Në intervistë për Radio Ejani ai tregon për pasionin e tij për vallen, koncertet me ansamblin popullor dhe projektet në vazhdim.

Flavio Xhaferi ne skene (Foto personale)

CMG: Si u bërë pjesë e Ansamblit të Këngëve dhe Valleve Popullore?

Flavio Xhaferi: Unë jam bërë pjesë e ansamblit popullor në qershor të vitit 2019, gjatë përfundimit të gjimnazit. Në 19 qershor mora lajmin e mirë që fitova audicionin  dhe që atëhere jam pjesë e ansamblit. Ky ishte një lajm i mirë për mua, prindërit e mi dhe gjithë shoqërinë time.

CMG: Para pak kohësh debutove si solist i disa valleve në premierën e ansamblit kushtur valltares së mirënjohur Lili Cingu. Si u ndjeve si artist në këtë koncert?

Flavio Xhaferi: Kemi bërë më shumë se një muaj prova për këtë koncert  dhe ishte privilegj për ne, që të performinim për një emër të madh të valles shqiptare si Liliana Cingu. Kam qenë solist në vallet “Trio e Malësisë së Madhe”, “Vallja e Logut”, “Vallja çame” ku kam qenë solist i dytë, pra ndihmoja solistin dhe performinim të dy në skenë. Gjithashtu kam qenë solist te “Vallja e shqipeve”, që është valle kopertine e ansamblit kombëtar, si dhe te vallet “Barinjtë e Korabit” dhe “Vallja e Rexhës “që përfaqëson Lili Cingun.

Flavio gjate nje shfaqje (Foto personale)

CMG: Cilat ishin emocionet që përjetove në skenë, por dhe pas shfaqjes së kësaj premiere?

Flavio Xhaferi: Gjithmonë kam pasur mbështetjen e publikut, sepse për mua si artist publiku është shumë domethënës. Unë i përkushtohem shumë spektatorit  dhe në fund marr reagimet e tyre pozitive, që nxjerr në pah punën time të palodhshme, besimin, vullnetin tim dhe shpirtin që unë i jap valles. Publiku sheh atë që ti ndjen në shpirt dhe performon në skenë, ajo është vallja për mua. Vallet përveç pjesës kërcyese kanë dhe anën shpirtërore sesi ndjehet njeriu në vallet epike, lirike. Çdo valltar duhet të përshtatet me fabulën e valles, sepse ka valle vajtimi, valle të gëzueshme, valle trimash e duelesh. Janë shumë valle të cilat shprehin gjendje të ndryshme të njeriut.

CMG: Je cilësuar si “djali i artë” i ansamblit. Çdo të thotë ky vlerësim për ty?

Flavio Xhaferi: Është një vlerësim shumë i madh për mua dhe ma kanë thënë shumë njerëz të njohur në fushën e artit jo vetëm në valle, por dhe jashtë valles. Ky është një cilësim shumë i bukur për mua dhe më pëlqen shumë si titull.

Flavio me ansamblin (Foto personale)

CMG: Në cilën prej valleve ndjehesh më në karakter kur interpreton në skenë?

Flavio Xhaferi: Pavarësisht se jam njeri pozitiv dhe i qeshur, karakteri im në valle qëndron te epikja, valle e trimave me karakter burrëror, kreshnik që i përshtaten valleve të rënda, me shumë emocion, valle lufte dhe burrash të cilat i përshtaten karakterit tim. Jo sepse këto të tjerat nuk mund t’i bëj, por nëse vallet e jugut dhe Shqipërisë së mesme unë i kam 100 për qind, tek vallet e veriut unë kam 101 për qind. Ajo është arma ime e fortë.

CMG: Ke qenë në koncertet e ansamblit jashtë vendit?

Flavio Xhaferi: Kam qenë në Itali në një turne në bashkëpunim me agjensinë për diasporën, ku në Otranto dhamë një koncert me arbëreshët. Ndërkohë që një muaj më vonë kam qenë në Odesa të Ukrainës, ku kemi dhënë një koncert shumë të bukur. Ishte një emocion i veçante për mua, jam kënaqur shumë. Publiku na priti shumë mirë, sepse ata kanë mall për Shqipërinë, për vallet dhe kulturën tonë.

CMG: Flasim për premierën e ansambit kushtuar të madhit Besim Zekthi, që ti e ke shumë përzemër si artist dhe dëshiron të ndjekësh rrugën e tij të kërcimit.

Flavio Xhaferi: Besim Zekthi është një emër që për mua do të thotë shumë. Në premierën kushtuar legjendës Zekthi kam patur shumë punë dhe lodhje, madje nuk më ka zënë gjumi. Ishte një premierë shumë e bukur,  ku publiku më ka pritur mjaft mirë. Kam dhënë shpirtin dhe aty, si në çdo shfaqje që është e rëndësishme për mua, por kur bëhet fjalë për emra si Zekthi, Çeliku dhe Liliana Cingu dihet që privilegji është shumë i madh dhe duhet të kesh besim të madh te vetja për të dalë në skenë dhe për të dhënë 100 për qind. Kam njohur në atë shfaqje bashkëshorten e Besimit, Znj. Sadije si dhe vajzën e tij Etleva Zekthi, që sot unë e kam mikeshë të mirë. Pasi mbaroi shfaqja, të dyja erdhën në skenë shumë të përlotura. Vajza e tij Etleva më tha duke qarë më lejo të të përqafoj dhe të bëjmë një foto bashkë sepse më kujtove babin. Unë u preka shumë në ato momente. Pastaj takova dhe Znj. Sadije, dhe ka qenë një nga netët qe nuk e harroj, sepse lashë mbresa tek familjarët e këtyre që sot janë emra të mëdhenj të valles popullore shqiptare.

Flavio Xhaferi gjate nje performance ne skene (Foto personale）

CMG: Përveç talentit si valltar, kujt ja dedikon këtë sukses të arritur deri tani?

Flavio Xhaferi: Unë mendoj se talent ka çdo fushë, si arti, sporti dhe çdo fushë që i përkushtohesh mund të ketë talent, por pa punë talenti nuk mjafton. Mendoj se asnjëri nuk lind perfekt, por Zoti mund të të falë të dhënat  siç mi ka dhënë mua dhe talentin, por që duhet të punosh shumë për t’i vënë në punë.

Perfeksioni për mua është që çdo ditë njeriu të përmirësohet dhe atëhere mund të jetë perfekt. Përveç talentit që ma ka dhuruar Zoti, gjithçka tjetër ia dedikoj punës time të madhe, ku ka pasur raste që nga mëngjesi deri në darkë kam qenë në punë për të interpretuar solot. Pra është besimi që unë kam në vetvete, është koha që unë përkushtohem në punë, dhe në fund kam marrë përshtypje të mira jo vetëm nga kolegët e mi që gjithmonë më kanë mbështetur, por dhe njerëz të rëndësishëm në botën e valles.

Flavio Xhaferi (Foto personale)

CMG: Kush të ka mbështetur më tepër në rrugën artistike?

Flavio Xhaferi: Mbështetësit më të mëdhenj janë gjithmonë prindërit e mi, jo vetëm në valle, por dhe në jetë. Përveçse kanë një djalë artist në skenë, kanë rritur dhe një djalë artist në shpirt, i dua të gjithë njerëzit, jam shumë pozitiv, sepse në këtë botë duhet të jesh njeri i mirë. Gjithashtu ju jam mirënjohës disa personave, që janë profesorët e mi, zyshave të shkollës që kanë qenë gjithmonë mbështetje për mua. Dua të veçoj profesorin tim Genc Kastrati, i cili është personi që mbështet më shumë të rinjtë në art, profesorit tim Shpëtim Dajçi, i cili ka qenë i pari që nxori emrin tim për të shkuar në ansambël. Prej këtyre dy personave jam ky që jam sot.

Flavio Xhaferi ne interviste per CMG

CMG: Gjithashtu je pjesë e projektit për të rinjtë “Edukim përmes artit”. Flasim për këtë eksperiencë dhe interesin e të rinjve për të mësuar vallet shqiptare?

Flavio Xhaferi: Të them të drejtën para pak kohësh nuk e shihja shumë dëshirën e të rinjve, por tani sa vjen dhe bëhet më e madhe tek të rinjtë, të cilët i pëlqejnë vallet tona, kulturën dhe muzikën tonë popullore. Ky është një projekt në bashkëpunim me Ministrinë e Kulturës, Anamblit Popullor me disa nga gjimnazet e Tiranës. Në fund të qershorit u mbajt një shfaqje, ku performuan nxënësit e këtyre shkollave vallet e ansamblit dhe valle të përpunuara nga vetë shkollat. Kjo ishte një shfaqje shumë e bukur për rininë, por më vjen mirë se unë pavarësisht se jam i ri vetë, kam futur tek të rinjtë atë frymën që kultura jonë është shumë e pasur dhe e vlefshme.

CMG: Nëse do të duhej të hiqje dorë nga vallja, sa e vështirë do të ishte për ty ta merrje një vendim të tillë?

Flavio Xhaferi: Mund t’i kërkosh çdo artisti të heqë dorë nga çdo gjë në jetën e tij, por vetëm nga fusha e artit jo. Nëse i futesh artit, është shumë e vështirë të dalësh sepse ti nga vetja ke pritshmëri shumë të lartë, pra pretendon të jesh më i miri, të jesh një emër i madh në fushën e artit, por nëse ajo pritshmëria të kthehet në anën e kundërt, dhe zhgënjimi do të ishte i madh për të gjithë ne. Kështu që është e papranueshme tek ne që të heqim dorë nga ajo që ne sakrifikojmë ose do të saktifikojmë gjithë jetën tonë.

Flavio me koreografin Genc Kastrati (Foto personale)

CMG: Cilat janë projetet në vazhdim në lidhje me vallen?

Flavio Xhaferi: Përveç folktour që ne bëjmë çdo verë nëpër qytetet bregdetare të Shqipërisë, një projekt tjetër është në korrik, ku ansambli do të marrë pjesë në një festival folklorik  në Turqi, ku marrin pjesë shumë grupe folku nga e gjithë bota. Ky është një festival shumë i madh përsa i përket folkut të valleve dhe ne do të jemi pjesëmarrës. Madje do të punojmë shumë fort, sepse pas shumë vitesh ansambli është në formën më të mirë prej të rinjve që kanë ardhur dhe besoj se do ia dalim për të konkuruar për trofe.

Intervistoi: Gazmend Agaj