Foto nga VCG
Të dhënat nga Administrata Shtetërore e Rregullimit të Tregut e Kinës (SAMR) tregojnë që, deri në fund të majit 2024, në Kinë kishte 180 milionë e 450 mijë subjekte biznesi private. Ndër to, 55.177 milionë ishin ndërmarrje private dhe 125 milionë e 273 mijë biznese individuale. Ndërkohë, raporti i subjekteve të biznesit privat ndër të gjitha subjektet e biznesit u ngrit në 96.4 %, nga 95.5 % që ishte në vitin 2019.
Një zyrtar i SAMR-it u shpreh: “Kjo përqindje tregon përmirësimin e vazhdueshëm të mjedisit të biznesit në Kinë. Ajo do të thotë që regjistrimi i subjekteve të biznesit është më i lehtë dhe tregu ka gjallëri.”
Në janarin e sivjetshëm, Këshilli i Shtetit i Kinës publikoi dokumentin për përmirësimin e mëtejshëm të shërbimeve qeveritare, për ngritjen e efektivitetit administrativ dhe për të bërë punët përkatëse me efektivitet të lartë. Në këtë dokument është përcaktuar qartë lista e punëve përkatëse me 13 pika. Ndër to, tetë kanë lidhje me subjektet e biznesit, si hapja e restoranteve, aplikimi për furnizim me ujë, energji elektrike e internet, rirregullimi i kredibilitetit dhe regjistrimi e çregjistrimi.
Në qytezën Gaotang të provincës Shandong të Kinës Lindore, biznesmeni Guo Jianhong ka regjistruar në mars të këtij viti restorantin e tij të makaronave me mish viçi. Ai u shpreh: “Të gjitha dokumentet e biznesit i bëra në një sportel. Ishte shumë e volitshme, sepse kishte punonjës të posaçëm për kryerjen e procedurave përkatëse, gjë që ishte vërtet lehtësuese.”
Foto nga VCG
Në vitin 2023, SAMR bashkë me organet e tjera dhe krahinat e ndryshme kanë nisur një operacion për shfuqizimin e masave ose të politikave që pengojnë integrimin e tregut dhe konkurrimin e barabartë.
Në të gjitha krahinat e vendit u përzgjodhën 690 mijë masa e politika që ishin përpiluar para 31 dhjetorit 2022. Pas këtij operacioni u anuluan ose rishikuan 4218 masa e politika dhe u ndreqën një sërë veprimesh që kritikoheshin ashpër nga subjektet e biznesit, si kufizimi i lëvizjes së ndërmarrjeve, pengesa ndaj hyrjes së ndërmarrjeve të huaja dhe synimi për qarkullim të vogël vendor.
Foto nga VCG
Krahas këtyre, SAMR ka nisur veprimin e posaçëm të zbatimit të ligjit të “mbrojtjes”, që ka si synim kundërvënien ndaj konkurrencës jo të ndershme. Në mbarë vendin administratat e rregullimit të tregut të niveleve të ndryshme kanë kontrolluar mbi 13.29 mijë çështje për konkurrencën e padrejtë, duke vendosur gjoba me vlerë 582 milionë juanë.
Zv.drejtori i Institutit të Makroekonomisë të Kinës, Song Gelong u shpreh: “Konkurrenca e ndershme është kushti bazë për funksionimin efikas të një tregu. Duhet të përmirësohet në mënyrë të gjithanshme sistemi i konkurrencës së ndershme, të hiqen ose të anulohen vazhdimisht rregullat e masat që pengojnë integrimin e tregut dhe konkurrencën e barabartë, të shtohet fuqia e shtrëngimit gjatë kontrollit mbi konkurrencën e barabartë dhe të nxitet konkurrenca e plotë dhe kualifikimi sipas aftësisë komerciale të subjekteve të biznesit dhe të prodhimit. Kështu, do të realizohet shpërndarja e përmirësuar të burimeve të tregut”.
Foto nga VCG
Ditët e fundit, SAMR publikoi pjesën e parë të dokumentit “Masat kryesore për përmirësimin e mjedisit të biznesit 2024”, me synim që të mblidhen opinionet nga tregu dhe subjektet e biznesit. Mbi këtë bazë do të shpallen vazhdimisht masat konkrete që presin ndërmarrjet, si reforma për lehtësimin e hyrjes në treg dhe formimi i mekanizmit të përditësimit të rregullave mbi lejet administrative në kornizën e SAMR-it, duke bërë përpjekje për të krijuar një mjedis biznesi të klasit të parë të orientuar nga tregu, me sundim ligji dhe ndërkombëtarizim. (Jiang Lei)
