Antonjo Gjonaj (Foto personale nga promovimi i filmit )
“Hashtag 47” mban titullin filmi më i ri i aktorit shqiptar që jeton në Itali Antonjo Gjonaj. Premiera e këtij filmi u mbajt në Cinema Ideal Cytiplex Torino gjatë muajit qershor. Ai këtë herë vjen jo vetëm si aktor, por edhe si regjisor. Një punë intensive për të realizuar diçka të veçantë që do të mbahet mend gjatë. Antonjo ka shpalosur në këtë projekt gjithë idetë e tij, që nga skenari, idenë e së cilës ja besoi për ta shkruar bashkëshortes së tij, gazetares italiane Roberta Callegari. Surpriza në këtë promovin ishte përzgjedhja e kastit të protagonistëve të filmit. Ai arriti që të bindë anëtarët e familjes së tij, për të qenë pjesë e këtij filmi, ku mbizotëron familja e madhe Gjonaj. Përzgjedhja e kastit të protagonistëve, sipas Antonjos është një mënyrë e mirë për t’u dhënë zë ideve të tij, por gjithashtu për t’i përcjellë publikut, seriozitetin e tij në punë.
Një ndër prioritet artistike të Antonjos, është që ai një ditë të jetë pjesë e kinematografisë botërore. Nëpërmjet këtij filmi “#47” Antonjo ka dashur të shpalosë aftësitë e tij artistike si në aktrim ashtu edhe në rolin e regjisorit. Ai arriti që të shfaqë filmin e tij në Kinemanë e Torinos, në një nga ambjentet më të mëdha në veriun e Italisë, me një sallë me më shumë se 750 vende. Në intervistë për Radio Ejani, aktori dhe regjisori Antonjo Gjonaj, tregon gjithçka rreth këtij filmi.
CMG: Sapo ke sjellë premierën e filmit tënd më të ri "#47". Për çfarë flet ky film?
Antonjo Gjonaj: Ky është një film aksion dhe komedi.
CMG: Pse filmi mban titullin “#47”?
Antonjo Gjonaj: Është e pamundur të tregoj pse filmi quhet “#47”, pa treguar detajet nga filmi. Por do ishte mirë që publiku mund ta shihte vetë filmin, e më pas do arrijë në konkluzionin se përse filmi quhet kështu.
CMG: E kujt ka qenë ideja dhe skenari i filmit?
Antonjo Gjonaj: Subjekti është i imi, por për ta shkruar në mënyrë profesionale, skenarin ia besova Roberta Galigari, gazetare italiane, e lindur dhe e rritur në Itali. Kjo ishte një mënyrë e mirë për të arritur një nivel sa më profesional, ku Roberta shpalosi subjektin tim, duke realizuar skenarin e këtij filmi.
CMG: Çfarë mesazhi ke dashur të përcjellësh nëpërmjet këtij filmi?
Antonjo Gjonaj: Ka më shumë se një mesazh, e para janë të drejtat e grave, e dyta mbrojtja e ambjentit dhe realizimi i suksesit jo vetëm profesional, por edhe personal, pavarësisht vështirësive dhe situatave që na paraqiten në jetë.
CMG: Ke marrë pjesë edhe më herët në filma të tjerë në Itali. Këtë herë vjen jo vetëm si aktor, por për herë të parë edhe si regjisor. Si ishte për ty kjo eksperiencë e re?
Antonjo Gjonaj: Isha i emocionuar dhe krenar njëkohësisht që kam patur mundësinë të shpreh idetë dhe stilin tim të punës për realizimin e një filmi, e mbi të gjitha ta bëja këtë gjë në qytetin ku ka lindur kinemaja.
Antonjo Gjonaj (Foto personale nga promovimi i filmit )
CMG: Në postimet e tua para premierës në Torino, theksove se do kishte surpriza. Unë të ndoqa në rrjetet sociale dhe vura re se një nga surprizat ishte se interpretoje bashkë me familjarët e tu. Si të lindi kjo ide?
Antonjo Gjonaj: Unë kam një familje të madhe, e cila më ka përkrahur në çdo moment. Këtë herë kjo pjesëmarrje për këtë projekt erdhi natyrisht. Arlinda Gjonaj është motra ime këngëtare prefesioniste, por gjithashtu është diplomuar në Akademinë për Kinema në Milano dhe ka realizuar Master specializimi me të madhin Pupi Avati, të cilin ju me siguri e njihni. Admir Gjonaj, ish efektiv i forzave ushtarake, i specializuar në kërkim shpëtim në situata ekstreme, i cili ka kryer trajnime dhe specializime me efektivët më të përzgjedhur të forcave të armatosura Carabinieri. Ahmet Gjonaj ka studiuar për muzikë në Liceun Artistik “Jordan Misja” në Tiranë, ku për arsye të largimit nga Shqipëria nuk arriti t’i përfundojë studimet, por pasioni i tij për artin dhe muzikën mbetet gjithmonë i madh. Ai aktualisht është sipërmarrës i suksesshëm në Torino. Anxhela Gjonaj është një vajzë mjaft e talentuar, e cila po kryen studimet në Torino. Riljon Gjonaj studion në Milano, është sportist profesionist në artet marciale mix ( MMA).
CMG: A ka qenë e lehtë apo e vështirë që të bashkëpunoje me familjarët e tu?
Antonjo Gjonaj: Mendoj se është më e vështirë, për shkak se familjarët, nuk mund t’i pushosh nga puna.
CMG: Po publiku si e priti filmin dhe cilat ishin komentet e tyre?
Antonjo Gjonaj: Në fillim nuk mendonin që ne po bënim një punë serioze, por pasi panë premierën e filmit, i bëmë që të ndryshonin mendim.
CMG: Ku pret që të arrish pas realizimit të këtij filmi?
Antonjo Gjonaj: Është një fillim i mirë për krijimin e një rruge ku destinacioni limitohet nga fantazia.
Antonjo Gjonaj (Foto personale ne promovimn e filmit )
CMG: Kur do ketë mundësinë publiku shqiptar që ta ndjekë këtë film?
Antonjo Gjonaj: Momentalisht jemi në bisedime me disa platforma online, por ende nuk e kemi mbyllur këtë pjesë. Sapo të kemi të reja në këtë drejtim, do ju njoftoj dhe publiku do të gjejë mënyrën për ta ndjekur filmin nëpërmjet këtyre platformave.
CMG: Çfarë pret tjetër në karrierën tënde artistike?
Antonjo Gjonaj: Në karrierën time artistike, unë pres arritje jo vetën në kinemanë evriopiane, por edhe botërore.
CMG: Cili është plani yt i ardhshëm?
Antonjo Gjonaj: Mendoj që kësaj rradhe të kem thënë shumë gjëra, por me mirëkuptimin tuaj, do doja që planet e tjera t’i le surprizë, deri në publikimin zyrtar.
Antonjo Gjonaj (Foto personale nga promovimi i filmit
-“Hashtag 47” një film që arriti të duartrokitet jo vetëm nga publiku shqiptar, por edhe ai italian që ishte i pranishëm në promovimin e tij në Torino të Italisë, të cilët e përgëzuan artistin shqiptar për këtë ide dhe realizim. Ky është një film aksion- komedi, i cili flet për të drejtat e grave, realizimin prefesional, mbrojtjen e ambjentit, si dhe mundësinë e ndyshimit. Filmi është realizuar në vitin 2024 dhe vjen me një kast aktorësh shqiptar dhe italian. Xhirimet e tij janë realizuar në itali dhe në Francë. Ky është filmi i parë ku Antonjo Gjonaj vjen si aktor dhe regjisor njëkohësisht.
Aktrimi ka qenë një ëndërr e hershme e Antonjo Gjonaj. Ai ka interpretuar edhe më herët në disa filma në Shqipëri dhe në Itali, edhe krah emra të artit italian. Ai një vit më parë ka realizuar edhe Masterin për aktrim, në Associazione Torino Musical, një akademi artistike e cila formon artistë në profile të ndryshme. Këtë herë objektivi i tij ishte për të hapur rrugën për një linjë, për të vazhduar me projekte të tjera në të ardhmen e tij artistike. Por gjithashtu një mënyrë e mirë për të sjellë një produkt nga një shqiptar në Itali, që është vërtetë arritje që ai ka shfaqur filmin e tij, pikërisht në Torino, në vendin ku ka lindur kinemaja. Sipas aktorit dhe regjisorit Gjonaj, përshtatja e këtij filmi, është për tregun italian, por edhe atë evropian. Momentalisht ai është në bisedime me kolosin Amazon prime për t’ju dhënë mundësia të gjithë shikuesve që ta ndjekin këtë film në çdo vend të botës.
Intervistoi: Sava Lena
