Foto nga VCG
Sipas të dhënave të fundit, ekonomia kineze në muajin prill ka vazhduar prirjen e mirë të mëkëmbjes. “Motorët e rinj ekonomikë”, si ekonomia digjitale, prodhimi modern dhe zhvillimi i gjelbër, po bëhen gjithnjë e më shumë fuqi kryesore në kornizën ekonomike. Import-eksporti me tregjet tradicionale dhe tregjet e reja ka shënuar rritje të dukshme, ndërsa niveli i konsumit, me risitë e vazhdueshme të skenarëve të konsumit dhe përmirësimin e vazhdueshëm të mjedisit të biznesit, ka vazhduar prirjen e mëkëmbjes.
Fuqizimi i vazhdueshëm i “motorëve të rinj”
Në mes të majit, Zyra Kombëtare e Statistikave e Kinës publikoi në një konferencë shtypi treguesit kryesorë ekonomikë për prillin.
“Me shfaqjen graduale të efekteve të makropolitikave të përbashkëta, energjia e brendshme ekonomike është në mëkëmbje të vazhdueshme, perspektiva shoqërore është në përmirësim të vazhdueshëm, elementet që nxisin rritjen e vazhdueshme ekonomike janë në grumbullim të pandërprerë dhe prirja e mëkëmbjes së ekonomisë kineze do të konsolidohet më tej,” u shpreh para mediave zëdhënësja e kësaj zyre, Liu Aihua.
Tani ekonomia kineze ndodhet në fazën e ndryshimit të modelit të zhvillimit dhe po zbatohet thellësisht strategjia me zhvillim të nxitur nga inovacioni. Me formimin e shpejtë të sistemit modern industrial, ekonomia digjitale dhe zhvillimi me karbon të ulët po krijojnë më shumë pika të reja rritjeje dhe “motorët e rinj ekonomikë” po zmadhohen dita-ditës, çka ka ngritur fort fuqinë e vazhdueshme dhe elasticitetin e zhvillimit ekonomik të Kinës.
Në muajt janar-prill, ndërmarrjet e prodhimit të pajisjeve mbi përmasa (me të ardhura vjetore mbi 20 milionë juanë) zunë 32.4 % të të gjitha ndërmarrjeve industriale mbi përmasa dhe përqindja e vlerës së shtuar të sektorit të prodhimit me teknologji të lartë arriti në 15.4 % të tërë sektorit industrial, duke shënuar rritje të vazhdueshme sivjet. Krahas kësaj, niveli i prodhimit të makinave elektrike dhe baterive diellore pati rritje me përkatësisht 33.2 % dhe 18.2 %. Ndërsa vëllimi i shitjes me pakicë të mallrave në internet shënoi rritje me 11.1 %, duke zënë 23.9 % të vëllimit të përgjithshëm të shitjes me pakicë të mallrave të konsumit në mbarë vendin.
Foto nga VCG
Rritet tregtia me tregjet tradicionale dhe të reja
Përveç të dhënave pozitive në prodhim dhe fuqizimit të “motorëve të rinj”, edhe tregtia e Kinës në 4 muajt e parë ka pasur një rritje pozitive. Me mëkëmbjen e përgjithshme të tregtisë globale qysh prej fillimit të këtij viti, ndërmarrjet tregtare kryesore të Kinës kanë shënuar rritje në numrin e porosive e kontratave dhe niveli i besimit të këtyre ndërmarrjeve është në rritje të vazhdueshme.
Të dhënat nga Ministria e Tregtisë e Kinës tregojnë që në 4 muajt e parë të vitit 2024, import-eksporti i Kinës shënoi rritje me 5.7 %. Në muajin prill, rritja e import-eksportit u ngrit në 8 %. Ndërmarrjet tregtare po marrin më shumë porosi dhe kontrata ndërkombëtare. Në Yiwu të Zhejiang-ut këto ndërmarrje kanë kapur mundësinë e biznesit me rastin e Lojërave Olimpike të Parisit dhe kampionatit evropian të futbollit EURO 2024. Në 4-mujorin e parë të këtij viti, eksporti i mallrave sportive shënoi rritje me 45.6 %. Në platformat ndërkufitare të tregtisë elektronike është krijuar pika e shërbimit shumëgjuhësh dhe është vënë në përdorim asistenti tregtar AI, me të cilin mund të bëhet përkthimi i sinkronizuar dhe prodhimi i fotografive dhe videove.
Krahas rritjes së vëllimit tregtar, një tjetër prirje pozitive është që tregtia e Kinës me tregjet tradicionale dhe tregjet e reja ka pasur rritje të dukshme. Në muajin prill, me pakësimin e vëllimit të inventarit dhe mëkëmbjen e kërkesës, import-eksporti i Kinës me tregjet tradicionale kaloi nga rënia në rritje. Ndër to, tregtia me BE-në pati rritje me 3.3 % dhe me SHBA-në 6.2%. Ndërkohë, tregtia e Kinës me vendet e ASEAN-it dhe ato bashkëndërtuese të “Një brez, një rrugë” shënoi rritje përkatësisht me 14.4 % dhe 9 %.
Në panairin e Kantonit, që quhet edhe “barometri i tregtisë së jashtme të Kinës”, mbi 80 % e ndërmarrjeve pjesëmarrëse kanë ruajtur nivelin e porosive ose kanë pasur shtim të tyre.
Foto nga VCG
Konsumi, më shumë gjallëri me skenarë të integruar
Përveç prodhimit industrial dhe tregtisë ndërkombëtare, edhe niveli i konsumit ka pasur rritje pozitive.
Të dhënat statistikore tregojnë që, në prillin e këtij viti, vëllimi i përgjithshëm i shitjes me pakicë arriti në 3569.9 miliardë juanë, 2.3 % më shumë se në të njëjtin muaj të një viti më parë.
Edhe pse kjo rritje është pak më e ulët në krahasim me shifrën e marsit, zv.drejtori i studimeve ekonomike në Qendrën për Shkëmbime Ekonomike Ndërkombëtare të Kinës Liu Xiangdong u shpreh që një gjë e tillë ka ardhur për arsye se numri i ditëve të pushimeve është dy më pak se në të njëjtën periudhë të vitit të kaluar dhe baza e krahasimit me vitin e kaluar ishte e lartë.
“Po të hiqen ndikimet nga baza e lartë, sheh se kërkesat e konsumit janë në mëkëmbje e zgjerim të vazhdueshëm,” theksoi Liu.
Sipas të dhënave statistikore, në katërmujorin e parë të sivjetshëm, vëllimi i tregtisë me pakicë në sektorin e shërbimit ishte 8.4 % më shumë se në të njëjtën periudhë të një viti më parë. Krahas kësaj rritjeje të shpejtë, edhe motorët e rinj në konsum janë në rritje të pandërprerë. Konsumi në sektorin kulturor e turistik vazhdon të çlirojë potencialin e vet të madh dhe shitjet e çastit me pakicë dhe shitja me transmetim të drejtpërdrejtë e mallrave në internet kanë pasur zhvillim mjaft të shpejtë. Në 4 muajt e parë, vëllimi i shitjes me pakicë të mallrave në internet shënoi rritje me 11.1 %.
Zëdhënësja e Zyrës Kombëtare të Statistikave Liu Aihua vuri në dukje që tani në tregun e konsumit, konsumi i mallrave bazë të përditshme është në rritje të qëndrueshme, konsumi i shërbimeve ka një rritje të mirë dhe konsumi në internet po luan rol stimulues. Nga konsumi lidhur me sportet dimërore deri në konsumin gjatë pushimeve, tregu i konsumit po mëkëmbet me më shumë gjallëri.
Zv.drejtori i Zyrës së studimeve makroekonomike të Departamentit të Parashikimeve pranë Qendrës Kombëtare të të Dhënave të Kinës Zou Yunhan u shpreh që, qysh prej fillimit të këtij viti, konsumi në Kinë në përgjithësi po vazhdon prirjen pozitive. Konsumi i shërbimeve po luan një rol gjithnjë e më të fortë dhe konsumi gjatë pushimeve po tregon një “nxehje” më të dukshme.
“Konsumi i shërbimeve po shndërrohet nga konsumi i ndonjë kategorie të caktuar në konsum të integruar me zhvillim të përzier. Skenarët e konsumit me integrim të lartë dhe me integrim teknologjik janë më të pëlqyerit nga njerëzit,” tha Zou. (Jiang Lei)
