Një dyqan me kostume tradicionale kineze në rrugën Pingjiang të qytetit Suzhou të Kinës Lindore / foto CFP

Dizajni inovativ dhe tradicional ka rritur popullaritetin pasi më shumë konsumatorë kënaqen si me prakticitetin ashtu edhe me modën.

Ndërsa njerëzit ecin përgjatë rrugës së zhurmshme Pingjiang në qendër të qytetit Suzhou, në provincën Jiangsu të Kinës Lindore, ata shpesh shohin gra të veshura me stile të ndryshme qipao (cheongsam) dhe hanfu (fustane tradicionale kineze).

Fotografja  Zhang Xiyan është e zënë duke fokusuar në aparatin fotografik një nënë dhe vajzën e saj me veshje të bukura hanfu. Mes fluksit të vazhdueshëm të njerëzve, ajo kërkon këndet më të mira për shkrepjet e saj. Është interesante se pas kamerës, vetë Zhang ka veshur një qipao. Fotografja 32-vjeçare vesh çdo ditë qipao, madje zotëron rreth 20 fustane të tillë tradicionalë. Ajo zgjedh copa që në trashësi u përshtaten stinëve të ndryshme  të vitit.

“Është i përshtatshëm për veshjen e përditshme”, thotë ajo. "Nuk kam asnjë problem të vesh qipao në rrugë," thotë Zhang. "Suzhou është një qytet magjik.

Duke jetuar këtu, njerëzit do të fillojnë të duan stilet tradicionale të kostumeve dhe gjithashtu do të shijojnë aktivitetet tradicionale kulturore si pirja e çajit dhe luajtja e guqin (një  instrument tradicional me shtatë tela).

Turiste me kostume të "Stilit të ri kinez" në rrugën Pingjiang të qytetit Suzhou të Kinës Lindore / foto CFP

Në qytete si Suzhou, Hangzhou i provincës Zhejiang të Kinës Lindore dhe Luoyang i provincës Henan të Kinës Qendrore, trendi i veshjes së hanfu-së për foto në rrjetet sociale është në rritje. Stili i ri kinez (xinzhongshi) po bëhet një zgjedhje e përditshme popullore mes të rinjve, të cilët po e përvetësojnë gjithnjë e më shumë këtë stil në aspekte të ndryshme të jetës së tyre, nga veshja te ngrënia, jetesa dhe udhëtimet. Kombinimi i elementeve tradicionale kineze me dizajnin modern shpesh quhet xinzhongshi, ose "stili i ri kinez", i cili po fiton popullaritet si në produkte ashtu edhe në aktivitete.

Këtë pranverë, dyqanet e veshjeve të grave po shfaqin një sërë artikujsh të rinj të stilit kinez, me dizajne tradicionale si kopsa me nyje, modele reje dhe funde me fytyrë kali (mamianqun në kinezisht), një lloj fundi tradicional kinez i karakterizuar nga dizajni i tij i veçantë me pala . Trendi shtrihet përtej veshjeve, me një treg në rritje për produktet vendase të bukurisë dhe kulturore, si dhe mallrat shtëpiake dhe ushqimin e frymëzuar nga stili i ri kinez. Sipas raportit të trendit të konsumit të markës kineze të vitit të kaluar, lëshuar nga Instituti i Kërkimeve JD për Konsumin dhe Zhvillimin Industrial, numri i konsumatorëve kinezë që blejnë guochao - ose "China chic", një trend konsumi ku konsumatorët e rinj preferojnë produkte me kulturë kineze, këto të fundit u rritën me 74 përqind midis 2019 dhe 2022, ndërsa shitjet u rritën me 355 përqind.

Turiste me kostume të "Stilit të ri kinez" në rrugën Pingjiang të qytetit Suzhou të Kinës Lindore / foto CFP

Gjashtë vjet më parë, Zhang la vendlindjen e saj në provincën Fujian dhe u vendos në Suzhou, e tërhequr nga pasioni i saj për kopshtet tradicionale kineze dhe arkitekturën e lashtë. Që atëherë, ajo ka punuar si fotografe e pavarur. Shumica e fotosesioneve të saj u zhvilluan në rrugën Pingjiang dhe në Kopshtin e Administratorit të Përulur (Zhuozheng Yuan), i ndërtuar fillimisht në Dinastinë Ming (1368-1644). Në dy vitet e fundit, ajo ka qenë dëshmitare e më shumë grave të reja të veshura me hanfu duke ecur në rrugën Pingjiang dhe shumë prej tyre vijnë në vende piktoreske të veshura me fustanet tradicionale kineze për foto.

"Ka më shumë se 20 dyqane me qira në një rrugicë të vogël pranë korsisë kryesore të rrugës Pingjiang," thotë Zhang. "Veshjet vijnë në stile të ndryshme, nga kopjet tradicionale deri tek interpretimet më moderne, duke u ushqyer për shije të ndryshme."

Zhang takohet rregullisht me miqtë, të gjithë të veshur me fustane të tillë, për seancat e çajit. Përveç shijimit të pijes, ata marrin pjesë edhe në aktivitete tradicionale, si djegia e temjanit dhe aranzhimet me lule. Miqtë e saj kanë talente të ndryshme që i përkasin kulturës tradicionale kineze, disa dinë të luajnë mirë në instrumentin guqin, ndërsa disa janë mjeshtër të aranzhimit të luleve.

 "Është një komunitet ku ne mësojmë dhe ndajmë aftësitë me njëri-tjetrin," thotë ajo. Zhang i pëlqen aq shumë qipao-t, saqë e kalon kohën e lirë duke i qepur ato. Ajo tashmë ka bërë për vete 10 fustane të tillë. Madje ajo planifikoi të hapte një punëtori ku të  trajnonte të tjerët se si t'i bënin ato në të ardhmen ose të ishte vetë rrobaqepëse.

foto nga Java e Modës në Shangai 2024 

Të gjitha produktet janë shitur

48-vjeçarja Zhang Ying ka lindur në një familje rrobaqepësish. Pasi u diplomua në një kolegj profesional në provincën Guangdong me një diplomë në dizajnin e modës në vitin 2000, ajo shkoi në Shangai dhe  hapi atelienë e saj për qepjen e fustaneve tradicionale qipao

"Mamaja dhe gjyshja ime ishin rrobaqepëse. Ndonjëherë ato kalonin ditë të tëra duke bërë qipao për klientët në shtëpitë e tyre," kujton Zhang Ying. “Më pëlqente të bëja rroba që kur isha e re. I prisja rrobat e mamasë sime për të bërë veshje për motrën time më të vogël”.

Atelietë e saj të prodhimit të qipao-ve në Shanghai Jianjie, të fokusuara në fjalët kyçe të xinzhongshi dhe qipao, janë rritur në mënyrë të qëndrueshme gjatë 20 viteve të fundit, duke punësuar më shumë se 300 punëtorë. Gjatë pandemisë, ajo mbylli njërën prej atelieve dhe tani ka një ekip rrobaqepësie prej mbi 40 personash. Por me rritjen e fundit të kërkesës për veshje të reja të stilit kinez në Kinë, produktet e saj janë shitur në kohë rekord. Me një qarkullim vjetor që arrin në 100 milionë juanë (13.8 milionë dollarë), ajo ka vendosur të zgjerojë më tej ekipin e saj.

Gjatë dy dekadave të fundit, ndërsa ka trashëguar teknikat tradicionale të bërjes së qipaos nga familja e saj, ajo ka rafinuar vazhdimisht dizajnin dhe kombinimet e ngjyrave të cheongsam-it të saj, duke i bërë ato më moderne dhe më të përshtatshme për klientët. Vitet e fundit, ajo ka qenë gjithashtu inovative në zhvillimin e pëlhurave, duke endur dhe ngjyrosur personalisht të gjitha pëlhurat e përdorura në veshjet e saj.

Që nga fillimi i shkurtit, kishte mbi 2.6 milionë klikime në platformën e mediave sociale Xiaohongshu në lidhje me temën e hashtag-ut të "veshjes së re në stilin kinez" dhe e njëjta temë ka mbledhur gjithsej 10.2 miliardë shikime në Douyin, një rrjet social kinez i videove të shkurtra.

Zhang Ying ka vënë re këtë bum të papritur në popullaritetin e veshjeve xinzhongshi. Ajo e ka ndjerë drejtpërdrejt këtë rritje përmes shitjeve në transmetimet e saj të drejtpërdrejta në Douyin.

"Në këto transmetime të drejtpërdrejta, klientët ndonjëherë hyjnë në debate, duke u përpjekur të bëjnë të vetën një copë nga rrobat tona. Unë planifikovaa dy seanca transmetimi të drejtpërdrejtë në ditë për të shitur produktet e mia, por ekipi im më informoi se në magazinë nuk kishim më rroba " tha ajo.

Zhang vuri re  se kur klientët vizitonin atelienë e saj  për të provuar rroba, pa paguar ende për to, ata shpesh i mbajnë në duar veshjet që u pëlqejnë, nga frika se mund t'i rrëmbejë dikush tjetër.

"Një klient nga Kunming, provinca Yunnan e Kinës Jugperëndimore, erdhi në atelienë time, provoi disa rroba dhe bleu  37 copë menjëherë. Shumë nga klientët e mi janë blerës të rregullt," shton ajo.

Zhang Ying ka vënë re një trend: shumë njerëz tani po blejnë veshje xinzhongshi për përditshmëri dhe po bëhet e zakonshme t'i dallosh ato në rrugët e Shangait.

"Në të kaluarën, shumica e porosive të mia ishin për raste të veçanta si dasma, rreth 80 për qind. Vetëm 20 për qind ishin për veshje të përditshme. Por tani, është e kundërta," thotë ajo.

 Vitin e kaluar, ajo realizoi shumë veshje xinzhongshi për burra, dhe ato u shitën shpejt. Ajo përmend se ka një kërkesë të madhe edhe për veshjet e reja të meshkujve në stilin kinez, por aktualisht nuk ka kapacitete të mjaftueshme për ta përmbushur atë.

foto nga Java e Modës në Shangai 2024 

Pavarësisht rritjes së shumë markave të reja, ajo beson se sektori i ri i veshjeve të stilit kinez po hyn në një fazë konkurrence intensive.

Tong Jisheng, drejtor i Komitetit Organizativ të Javës së Modës në Shangai, thotë se dizajnerët duhet të prodhojnë veshje më inovative xinzhongshi për të udhëhequr tendencat e modës, ndërsa duhet t'i bëjnë produktet të aksesueshme për një numër më të madh të konsumatorëve të zakonshëm, duke lejuar më shumë njerëz t'i vlerësojnë ato. Të dhënat nga Këshilli Kombëtar i Tekstileve dhe Veshjeve të Kinës tregojnë se në vitin 2023, tregu i veshjeve xinzhongshi të Kinës u rrit në 1 miliard juanë dhe gjatë tre viteve të fundit, vëllimi i përgjithshëm i transaksioneve të produkteve të lidhura është rritur me një normë që tejkalon 100 përqind.

Një shfaqje me kostumin tradicional kinez "Qipao" në qytetin Shenyang të Kinës Verilindore / CFP

Më shumë fusha

Media sociale ka luajtur një rol të rëndësishëm në rritjen e popullaritetit të veshjeve të reja të stilit kinez të Zhang Ying në internet me më shumë klientë që e njohin markën e saj përmes Douyin. Ndërkohë, joshja e dekorit të ri të shtëpisë në stilin kinez po fiton gradualisht vëmendjen në shtëpi, dyqane dhe hapësira zyrash. Në fushën e mobiljeve xinzhongshi, nuk ka një përkufizim të saktë. Për konsumatorët e rinj të sotëm, ka të bëjë me përzierjen kreative të elementeve tradicionale kineze me estetikën moderne për t'iu përshtatur shijeve bashkëkohore, sipas shumë ekspertëve të dekorit të shtëpisë.

Në lagjen Daxing të Pekinit ndodhet Qendra e Artit Tianwu, e cila u përfundua vitin e kaluar. Që nga hapja e saj, shumë vizitorë janë tërhequr për të eksploruar shembuj të prekshëm të stileve të dekorimit të shtëpisë xinzhongshi të ekspozuara. Ma Yuchen, menaxheri i përgjithshëm i qendrës, shpjegon se ajo shërben si një vitrinë për estetikën dhe stilin e jetës së tyre unike të dizajnit të stilit kinez.

Për më tepër, është një hapësirë që pret ekspozita me marka inovative guochao dhe artistë avangardë. "Për vite, ne i jemi përkushtuar Tianwu, një markë e specializuar në mobilje të reja të stilit kinez," thotë Ma.

Themeluesi i markës, Zhong Song, i mbush dizajnet e tij me elemente kulturore kineze, duke theksuar estetikën e harmonisë midis njerëzve, natyrës dhe hapësirës.

"Shumë vizitorë e gjejnë qendrën tonë një hapësirë të qetë dhe të rehatshme, ku do të ndiheshin të lirë dhe të qetë," thotë Ma.

Ma sheh një rritje graduale të klientëve të interesuar për produktet e dekorimit të shtëpisë xinzhongshi, me të rinjtë që sapo kanë blerë shtëpitë e tyre të para, duke u bërë konsumatorët kryesorë.

“Pasi të kenë shtëpitë e tyre, ata shpresojnë të krijojnë hapësirat e tyre ideale të jetesës dhe të shprehen përmes hapësirave të tyre”.

Në një fushë tjetër joshëse, kuzhina e re e stilit kinez po bëhet gjithashtu më e popullarizuar në të gjithë Kinën, me një sërë ofertash që shfaqen në tavolinat e darkës, duke përfshirë prezantime të rafinuara të pjatave tradicionale kineze dhe shkrirjen e përbërësve dhe shijeve kineze në kuzhinën perëndimore.

Pasi studioi artet perëndimore të kuzhinës në Zvicër, 34-vjeçari Cai Jiahao u kthye në Pekin dhe hapi restorantin e tij, Les Morilles, në vitin 2017. Gjatë shtatë viteve, ai ka zhvilluar stilin e tij të gatimit duke përfshirë elementë lokalë kinezë në pjatat e tij, duke krijuar kombinime të reja. "Disa metoda dhe përbërës erëzash në Kinë janë unike dhe nuk gjenden jashtë vendit," shpjegon Cai, duke shtuar se "konsumatorët kinezë preferojnë shije më të lehta në krahasim me shijet e pasura të kuzhinës tradicionale perëndimore". Les Morilles kohët e fundit prezantoi një menu pranverore të quajtur Coucou në frëngjisht, me tetë kurse. Duke përdorur përbërës si gaforrja, fistiku, karavidhe dhe viçi Wagyu si bazë, Cai shton përbërës dhe erëza shtëpiake sezonale për të nxjerrë në pah freskinë e pranverës, si shpargujt jeshil të Fujian-it, shpargujt e bardhë të Shandong dhe qitrot nga Jiangsu.

Autor i artikullit Li Yingxue