Foto nga VCG
Këtë javë, në Pekin u zhvillua Forumi i Zhvillimit i Kinës 2024. Në këtë aktivitet, zv/ministrja e Tregtisë e Kinës Guo Tingting, u shpreh se Kina do të përpiqet të krijojë markën "Invest in China", do të përmirësojë pandërprerë shërbimet përkatëse, do të ofrojë garanci të gjithanshme për ndërmarrjet e huaja me trajtime kombëtare, me synimin që gjithnjë e më shumë ndërmarrje të huaja, të bëjnë investim në mënyrë të sigurtë në Kinë, dhe të vendosin thelbin e biznesit të tyre në ekonominë e dytë të botës.
Ky është një sinjal i qartë nga qeveria kineze, që me nivelin më të lartë të hapjes me botën e jashtme, Kina do të injektojë më shumë siguri për rimëkëmbjen ekonomike dhe zhvillimin e qëndrueshëm të botës, dhe do të ofrojë më shumë hapësirë për investitorët nga vendet e ndryshme.
“Invest in China”, marka për lidhje të thellë me tregun kinez
Në fakt, "Invest in China" është paraqitur në mbledhjen qendrore ekonomike, të zhvilluar në fund të vitit 2023, dhe është një kryemision për zhvillimin ekonomik të Kinës. Kohët e fundit, Kina ka marrë masa të ndryshme për të ndërtuar një mjedis me nivelin e parë ndërkombëtar që orientohet nga tregu, me sundim ligjor dhe me ndërkombëtarizim.
Për të krijuar më shumë kushte pozitive dhe nxitëse në këtë drejtim, zëdhënësi i Ministrisë së Tregtisë të Kinës, He Yadong bëri të ditur para mediave, që në 2024 do të zhvillohen aktivitete të posaçme me këtë temë, për të krijuar lehtësi dhe kushte të mira për investitorët e huaj, të cilët mirëpriten të vijnë në Kinë, të njohin nga afër Kinën dhe të bëjnë investim në mënyrë të sigurtë në ekonominë e 2-të botërore.
Foto nga VCG
Më 26 mars në Pekin, Ministria e Tregtisë dhe Bashkia e Pekinit zhvilluan aktivitetin e parë simbolik "Invest in China", për shtimin e lidhjeve dhe shkëmbimeve mes qeverive lokale dhe kompanive ndërkombëtare. Krahas këtyre, janë ofruar 3 itinerarë vizitash për shikim nga afër në tregun lokal. Deri tani, mbi 100 përfaqësues të kompanive ndërkombëtare dhe shoqatave tregëtare kanë marrë pjesë në këtë aktivitet.
Siç mësohet, në fillim të prillit, ky aktivitet do të zhvillohet edhe në qytetin Chongqing të Kinës Jugperëndimore. Tema e aktivitetit do të jetë "EXPO në Chongqing". Ky do të jetë aktiviteti i parë që Ekspozita e Importit (CIIE) zgjerohet në një krahinë jashtë Shangait, si dhe një pjesë e rëndësishme për aktivitetet seriale të markës "Invest in China".
Në këtë aktivitet, do të zgjerohet sfera e ndërmarrjeve pjesëmarrëse dhe do të ftohen në mënyrë të posaçme ndërmarrjet pjesëmarrëse të EXPO-s, institucionet për stimulim investimesh dhe kompanitë ndërkombëtare. Krahas këtyre, do të zhvillohen aktivitete nxitëse për lidhje biznesesh dhe promovim produktesh, me synim të nxiten "mallrat e ekspozimi të bëhen mallra konsumi, ndërmarrjet ekspozuese të bëhen ndërmarrje investuese".
Hapje me nivel të lartë, shans i rëndësishëm për Kinën dhe investitorët e botës
Në Forumin e Zhvillimit të Kinës 2024, zv/ministrja e Tregtisë, Guo Tingting u shpreh se Kina do të zgjerojë më tej hapjen e saj të nivelit të lartë në botën e jashtme, duke theksuar se Kina është tregu i dytë më i madh në konsumin e mallrave, dhe ka formuar grupin me përmasat më të mëdha botërore me të ardhura të mesme. Ky grup ka 400 milionë njerëz.
Foto nga VCG
Sipas saj, Kina jo vetëm ka potencial të gjerë rritjeje për konsumin e shërbimeve, por gjithashtu do të lëshojë kërkesë të madhe në fusha, si urbanizimi i ri, prodhimi modern dhe transformimi i gjelbër e me karbon të ulët.
Më 22 mars, u publikua lista negative për tregtinë e shërbimeve ndërkufitare me versionin kombëtar dhe versionin eksperimental për zonat e tregtisë së lirë. Kjo, sipas Ministrisë së Tregtisë, do të përmirësojë në mënyrë të dukshme nivelin e hapjes së sektorit të shërbimeve.
Krahas këtyre, po zbatohet në mënyrë konkrete heqja e gjithanshme e kufizimeve të investimeve të huaja në sektorin industrial, dhe do të nxitet më tej hapja në sektorë, si telekomunikacioni dhe shëndetësia, çka do të ofrojë më shumë shanse për ndërmarrjet e vendeve të ndryshme.
Në ceremoninë e hapjes së Forumit të Zhvillimit të Kinës 2024, Drejtori i Komitetit Kombëtar për Zhvillim dhe Reformë të Kinës, Zheng Shanjie u shpreh se zhvillimi i Kinës me produktivitet të ri cilësor do të nxisë zhvillimin e vet, por edhe do të injektojë gjallëri më të fuqishme për rimëkëmbjen botërore dhe do të sjellë mundësi gjigante për ndërmarrjet ndërkombëtare.
Ai theksoi, që një nga drejtimet kryesore për zhvillim me produktivitet të ri cilësor, është pikërisht hapja me nivel të lartë.
Foto nga VCG
Për zgjerimin e hapjes me nivel të lartë, Kina do të shtojë "tre bashkëpunime". Së pari, do të shtojë bashkëpunimin ndërkombëtar në sektorin teknologjik dhe shkencor. Do të mbështetë ndërmarrjet e huaja teknologjike që të bëjnë kërkim dhe eksplorim teknologjik, bashkë me ndërmarrjet vendase. Së dyti, do të shtohet bashkëpunimi mes njerëzve. Do të shtohet lehtësia për udhëtim dhe do të ofrohen lehtësira për të huajt të bëjnë punë, studim dhe turizëm në Kinë. Së treti, do të shtohet bashkëpunimi në investim dhe tregti. Do të zgjerohet në mënyrë të qëndrueshme hapja sistemore, do të nxitet thellësisht hapja me nivel të lartë në tregtinë e shërbimeve dhe investime ndërkufitare. Do të bëhen më shumë përpjekje në tërheqjen e investimeve të huaja, dhe të zhvillohet bashkëpunimi pilot në telekomunikacionin me vlerë të shtuar, diagnostikim dhe mjekim gjenetik. Ndërkohë, do të përshpejtohet hartimi dhe publikimi i listës negative për investime të huaja në vitin 2024, ku do të hiqen në mënyrë të gjithanshme kufizimet për hyrjen e investimeve të huaja në sektorin industrial.
(Jiang Lei)
