Foto nga VCG
Më 5 mars filloi në Pekin sesioni vjetor i Komitetit të Përhershëm të legjislaturës së 14-të të Asamblesë Kombëtare Popullore (AKP). Në ditën e hapjes së këtij sesioni, kryeministri kinez Li Qiang i paraqiti Komitetit të Përhershëm të AKP-së raportin e punës qeveritare, ku janë përmendur arritjet kryesore të ekonomisë kineze, si edhe detyrat e ardhshme për zhvillimin e ekonomisë së dytë më të madhe të botës në epokën e re.
Vitin e kaluar, Kina njohu një zhvillim mjaft të qëndrueshëm ekonomik, duke pasur sukses në sektorët e energjetikës, industrisë, teknologjisë etj. Kjo ka siguruar një zhvillim me cilësi të lartë për ekonominë kineze, duke formuar forca të reja prodhuese cilësore për zhvillimin e Kinës.
Foto nga VCG
Motori i ri me energji të reja
Në raportin e punës qeveritare, është përmendur që në vitin 2023, prodhimi dhe shitja e automjeteve kineze me energji të re në tregun global i ka kaluar 60 % dhe eksporti i “tre të rejave” (automjeteve elektrike, baterive diellore dhe baterive të litiumit) ka pasur një rritje të madhe prej 30 %, duke përbërë një “motor” të fuqishëm për rritjen ekonomike të Kinës.
Krahas produkteve dhe mallrave me energji të re, qeveria kineze ka deklaruar edhe objektivin e saj për zhvillimin e gjelbër: Në vitin 2024, harxhimi i energjisë për njësi të GDP-së do të pakësohet me 2.5 %. Kjo duhet të realizohet nga zhvillimi me karbon të ulët.
Vitin e kaluar Kina ka bërë mjaft investime edhe në sektorin energjetik, kurse më 2024, do të shtojë investimet në këtë drejtim.
Në fund të shkurtit të këtij viti filloi ndërtimi i projekteve të energjisë së re të grupit “Huaneng” të Kinës. Niveli i prodhimit të energjisë i këtyre projekteve parashikohet të jetë 34 milionë kilovatorë, ndërsa vëllimi i investimeve infrastrukturore energjetike pritet të arrijë në 150 miliardë juanë.
Foto nga VCG
Vlen të përmendet që investimet do të bëhen për disa energji të ndryshme, gjë mund të nxitë produktivitetin e ri cilësor. Siç mësohet, ky kontingjent projektesh ka katër modele të ndryshme. Në krahinat veriore modeli është integrimi i prodhimit të energjive të erës, diellore e fotovoltaike dhe rezervimi energjetik; në krahinat bregdetare në Kinën Lindore zbatohet modeli me energjinë e erës dhe bërthamore të mbështetur nga teknologjia inteligjente; në jugperëndim është modeli i energjive ujore, të erës dhe fotovoltaike; ndërsa në krahinat lindore dhe qendrore, modeli i energjive të erës dhe fotovoltaike.
Zv.drejtori i Drejtorisë së Ruajtjes së Energjisë dhe i Pajisjeve Teknologjike të Administratës Energjetike Kombëtare të Kinës, Bian Guangqi u shpreh që, qysh prej fillimit të planit të 14-të 5-vjeçar, instalimi i pajisjeve të reja për rezervimin e energjive të reja ka nxitur mbi 100 miliardë juanë investime dhe ka zgjeruar më tej pjesët e ndryshme të zinxhirit industrial, duke u bërë motori i ri për zhvillimin ekonomik të Kinës.
Nxitja e konsumit, masë e rëndësishme për zhvillimin me cilësi të lartë
Konsumi është një ndër tre motorët kryesorë të zhvillimit ekonomik. Pas zhvillimit të shpejtë prej disa vjetësh, ai po luan një rol gjithnjë e më të rëndësishëm për ekonominë kineze, posaçërisht për zhvillimin me cilësi të lartë.
Në raportin e paraqitur nga kryeministri është theksuar misioni i qeverisë kineze për nxitjen e konsumit.
“Do të inkurajohet dhe do të nxitet zëvendësimi i mallrave të vjetra me të reja, do të stimulohet konsumi i produkteve me çmim të lartë, si makinat me energji të reja, produktet elektronike etj.”, u shpreh kryeministri kinez në ditën e hapjes së sesionit të AKP-së.
Foto nga VCG
Në fakt, në mbledhjen qendrore ekonomike të zhvilluar në fund të 2023-shit, u shpall që në vitin 2024, duhet të nxitet ndërrimi masiv i pajisjeve dhe produkteve të konsumit. Më pas, më 23 shkurt të këtij viti, para hapjes së dy sesioneve të vitit 2024, në mbledhjen e 4-t të komisionit financiar të Komitetit Qendror të Partisë Komuniste të Kinës, u vu theksi sërish në përshpejtimin e ndërrimit të brezave të produkteve, si një masë e rëndësishme për zhvillimin me cilësi të lartë, duke thënë se duhet të inkurajohet dhe të drejtohet raundi i ri i ndërrimit masiv të pajisjeve e produkteve.
Me këto sinjale të qarta për nxitjen e konsumit, mund të parashikohet që sektorët përkatës do të publikojnë masa konkrete, si subvencionet nga nivelet e ndryshme të qeverisjes dhe kredidhënia nga institucionet financiare. Krahas kësaj, edhe më shumë fabrika për prodhimin e mallrave përkatëse, si makinat dhe pajisjet elektro-shtëpiake, do të marrin masa promovuese.
Për ndërrimin e pajisjeve dhe produkteve, analistët janë të mendimit që ky raund masash nxitëse do të ketë përmasa më të mëdha dhe do të mbulojë sektorë më të shumtë. Besohet që kjo mund të aktivizojë në mënyrë efektive konsumin e qytetarëve. Gjithashtu, rritja e shitjes me pakicë të mallrave të konsumit në vitin 2024 pritet të vazhdojë të shënojë shifrën rreth 6.5 %. Me një bazë më të lartë të vitit 2023, kjo do të thotë që niveli i konsumit nga qytetarët më 2024 do të ketë një rritje më të fuqishme. (Jiang Lei)
