Foto nga VCG
Në dy sesionet në rang provincash të zhvilluara kohët e fundit, organet e pushtetit vendor të krahinave të ndryshme të Kinës kanë publikuar arritjet e tyre në vitin 2023, me rritjen e GDP-së gjerësisht mbi nivelin e parashikuar.
Rezultate pozitive më 2023
GDP-ja e të gjitha 31 provincave të Kinës më 2023 ka realizuar rritje. Rajoni Autonom i Xizang-ut (Tibet) dhe provinca Hainan kanë zënë dy vendet e para përkatësisht me 9.5% e 9.2%. Pas tyre vjen Rajoni Autonom i Mongolisë së Brendshme me 7.3 %. Krahas këtyre, Rajoni Autonom Ningxia-Hui, provincat Gansu, Jilin, Shandong, Sichuan dhe Zhejiang e qyteti i varur nga qendra Chongqing kanë shënuar rritje mbi 6 %. Shumica e krahinave kanë pasur rritje 4-6 %.
Përveç rritjes, edhe vëllimi i GDP-së është një tjetër tregues kyç. GDP-ja e Guangdong-ut për herë të parë i kaloi 13 trilionë juanët, 4.8 % më shumë se më 2022. Vlen të përmendet që vëllimi i përgjithshëm i ekonomisë të kësaj province të Kinës Jugore për 35 vjet me radhë ka zënë vendin e parë në Kinë.
Në raportin e punës të Guangdong-ut thuhet që, në vitin 2023, ekonomia private ka treguar mjaft gjallëri dhe elasticitet. Numri i ndërmarrjeve në këtë provincë i ka kaluar 7.8 milionët, sa një e shtata e vëllimit të përgjithshëm të vendit.
Shandong-u është vlerësuar si provinca me mjedisin më të mirë të biznesit në vend. Numri i grupimeve me industri karakteristike në rang kombëtar për ndërmarrjet e vogla dhe të mesme ka arritur në 15 dhe në këtë provincë të Kinës Lindore janë shtuar 299 ndërmarrje “profesionale, specifike, të posaçme dhe inovative”.
Pekini dhe Shangai janë dy fuqi kryesore të rritjes ekonomike. Në vitin 2023, numri i organizatave ndërkombëtare të regjistruara në Pekin është rritur në 115 dhe numri i stacioneve të reja 5G ishte 30 mijë. Krahas këtyre, Pekini ka shënuar shumë “të para” në vitin 2023, si GDP-ja për frymë, produktivitet i përgjithshëm, përdorimi më i paktë i energjisë dhe ujit për 10 mijë juanë të GDP-së... Shangai, si metropol me famë botërore, ka arritur rekordin e shfrytëzimit të kapitaleve të huaja me 24 miliardë dollarë dhe niveli i transaksioneve në tregun financiar shënoi rritje me 15 %, duke krijuar një mjedis mjaft tërheqës për investitorët ndërkombëtarë.
Foto nga VCG
Anëtarët e rinj në klubin “Trilion”
Pas publikimit të raportit të punës nga Jiangsu dhe Shandong, dy qytete - Changzhou i Jiangsu-së dhe Yantai i Shandong-ut - janë “anëtarësuar” në klubin “Trilion”, pra me një GDP mbi një trilion juanë, duke e çuar numrin e anëtarëve të këtij “klubi” në 26.
Changzhou në vitin 2023 ka shënuar rritje me 6.8 %, duke u futur me sukses në klubin “Trilion”. Për zhvillimin e shpejtë, sektori i energjisë së re ka ofruar një nxitje të fuqishme, duke shënuar vlerën mbi 760 miliardë juanë dhe duke prodhuar rreth 680 mijë makina me energji të re. Investimet në këtë drejtim janë renditur në vendin e parë në Kinë.
Yantai është një qytet industrial në Kinën Lindore. Më 2023, me sektorin e fuqishëm të prodhimit dhe me efektet e dukshme të transformimit të modelit industrial, Yantai ka hyrë me sukses në klubin “Trilion” me mbi 900 miliardë juanë të krijuar nga sektori industrial. Vlen të përmendet që sektori i teknologjive të reja zuri mbi 60 %, 10 pikë përqindjeje më shumë se mesatarja e provincës Shandong.
Foto nga VCG
Objektivat për 2024
Për vitin 2024, krahinat e ndryshme kanë publikuar në raportin e tyre objektivat për zhvillimin ekonomik.
Xizang dhe Hainan janë dy krahina me rritjen më të shpejtë dhe për 2024 ato kanë deklaruar objektivin e rritjes rreth 8%. Krahinat e tjera kryesisht kanë caktuar objektivat e rritjes në rreth 5%. Guangdong, Jiangsu dhe Shandong, që zunë tre vendet e para vjet, deklaruan që GDP-ja e tyre për sivjet do të jetë 5% ose më shumë.
Krahas GDP-së, krahinat e ndryshme kanë caktuar detyrat kryesore për vitin 2024. P. sh., provinca Sichuan do të fokusohet tek inteligjenca artificiale. Anhui do të krijojë ndërmarrje të rangut të parë botëror në prodhimin e automjeteve. Shangai do të bëjë më shumë përpjekje për përmirësimin e jetesës së qytetarëve këtë vit: 4 mijë shtretër të rinj në shtëpitë e të moshuarve, 30 mensa të reja në lagje për të moshuarit, 3 mijë vende të reja pranimi në kopshtet publike të fëmijëve dhe 7 mijë qendra për shërbime të tilla për fëmijët në lagje, 70 mijë banesa ekonomike me qira dhe mbi 10 mijë banesa të tilla për shitje, si edhe 3 mijë ashensorë për banesat ekzistuese.
Krahas këtyre, edhe Hainan do të përqendrohet te “Projekti nr. 1” për portin e tregtisë së lirë. Dalian-i si qytet kryesor në Liaoning të Kinës Verilindore ka deklaruar që do të përpiqet për të hyrë në klubin “Trilion”. Pekini do të nxitë më tej potencialin e konsumit dhe Jiangsu do të forcojë shtimin e konsumit me krijimin e më shumë markave vendase dhe skenarëve të rinj të konsumit...
Për vitin 2024, Kina është gati! (Jiang Lei)
