Pothuajse çdo ditë jave, Yi Xiaoqin, 28 vjeç, vrapon midis zyrave të mjekëve, arkës dhe sallës së operacioneve në spitale të ndryshme në Chongqing. Ajo nuk kërkon ndihmë mjekësore, por shoqëron njerëzit që kanë nevojë për ndihmë.
Foto:VCG
E veshur me një pulovër të kuqe dhe pantallona të zeza, Yi duket si një punonjëse zyre. Zëri i saj është i butë, një cilësi thelbësore për punën e saj si ndihmëse spitalore.
Vitet e fundit, ndihmësit në spital - një profesion relativisht i ri - janë përhapur në vende me një përqindje në rritje të banorëve të moshuar. Ata mund të shihen në qytetet e nivelit të parë në Kinë, si Pekini, Shangai dhe Guangzhou, si dhe qytete të tjera si Chongqing dhe Hangzhou, provinca Zhejiang.
Shërbimet e tyre përfshijnë ndihmën për të lënë një takim me një mjek ose marrjen e rezultateve të testeve laboratorike. Ata gjithashtu shoqërojnë pacientët gjatë gjithë procesit të trajtimit.
"Më duhet të marr vajzën time 4-vjeçare në ditët e shkollës në orën 17:00 dhe të kujdesem për të në shtëpi nëse ajo sëmuret. Kështu që unë bëhem një “peizhenshi”, me orar fleksibël pune",- tha Yi për “China Daily”.
“Peizhenshi” është një term për ndihmësit: “pei” do të thotë shoqëroj, “zhen” do të thotë diagnostikoj dhe “shi” do të thotë profesionist.
Të dhënat nga Regjistrimi i Shtatë Kombëtar tregojnë se madhësia mesatare e një familjeje kineze u tkurr nga 3.1 në 2010-n në 2.62 në 2020-n.
Duke pasur parasysh familjet më të vogla dhe popullsinë në plakje, nevoja për njohuri profesionale dhe kujdes dhe aftësia për të paguar janë arsyet e përhapjes së këtij profesioni, - tha He Wenjiong, nënkryetar i Shoqatës Kineze të Sigurimeve Shoqërore dhe kreu i Qendrës Universitare për Plakjen dhe Shëndetin në Zhejiang.
"Me rritjen e numrit të të moshuarve dhe urbanizimin e vazhdueshëm, nevoja për ndihmës në spital do të vazhdojë të rritet",- tha ai.
Jo shumë kohë më parë, Yi takoi një grua rreth të 70-tave, e cila ishte paciente në Spitalin e Parë të Asociuar të Universitetit Mjekësor Chongqing. Gruaja jeton me burrin e saj në Chongqing dhe ka fëmijë të rritur që punojnë në qytete të tjera.
"Ne u takuam në spital",- tha Yi. “Ajo nuk po gjente dot vendin ku duhej të shkonte dhe erdhi tek unë për ndihmë”.
Gruaja shkoi te një psikiatër sepse kishte probleme me gjumin. Yi e shoqëroi tek priste ekzaminimet dhe më pas e ndihmoi të merrte raportet pasuese.
"Ajo tha se isha një ndihmë e madhe dhe e lehtësova ankthin e saj",- tha Yi.
Yi zakonisht tarifon 200 juanë (31,50 dollarë) për një gjysmë dite shërbimi dhe 300 juanë për një ditë të plotë. Të moshuarës ajo i mori 100 juanë.
“Disa klientë mendojnë se tarifa është shumë e lartë dhe të tjerë nuk u besojnë ndihmësve”,- tha Yi.
Por për habinë e Yi, edhe të rinjtë përdorin shërbimet e ndihmës. “Të rinjtë janë më të hapur dhe më besues”, - tha ajo.
Foto:VCG
Një herë ajo shoqëroi një grua rreth të 20-ave, e cila kishte nevojë për një abort, sepse fetusi i saj ndaloi rritjen. Bashkëshorti i gruas nuk mundi ta shoqëronte për shkak të orarit të ngjeshur të punës. "E prita para sallës së operacionit. Ajo ishte e emocionuar dhe ndjeu ftohtësi pas procedurës. E përqafova dhe mora një taksi me të",- tha Yi.
Yi tha se sektori i shërbimit të ndihmës spitalore po rritet, i mbështetur nga një numër në rritje i të moshuarve, si dhe nga të rinjtë që jetojnë larg prindërve të tyre. Ajo organizoi një grup prej 10 ndihmësish, kryesisht nëna që kanë nevojë për orar fleksibël të punës.
“Që kur punoj në këtë fushë, kam takuar shumë klientë dhe jam njohur me vështirësitë e tyre”,- tha ajo. “I trajtoj si familje, duke u ofruar shërbime dhe ngushëllim”.
Në shumë raste, porositë vijnë me telefon, përmes platformave të mediave sociale, si “Sina Weibo” dhe “Xiaohongshu” ose platformave të tregtisë elektronike, si “Taobao”. Burimet mjekësore të Pekinit kanë tërhequr shumë njerëz për të kërkuar trajtim nga i gjithë vendi.
Cheng Nuo, një studente kolegji 22-vjeçare nga Pekini, filloi të punonte me kohë të pjesshme si ndihmëse në spital në janar.
"Duke marrë parasysh pandeminë Covid 19, njerëzit që jetojnë larg prindërve të tyre duan që dikush t'i shoqërojë prindërit e tyre gjatë vizitave në një spital në një qytet tjetër",- tha ajo.
Cheng përshkroi përvojën e shoqërimit të një çifti rreth të 50-ave, që vinte nga provinca Shandong në Spitalin e Tretë Universitar të Pekinit për të trajtuar këmbën e burrit. Vajza e tyre punon në Shenzhen dhe nuk mund të ishte me ta.
“Ajo më gjeti në internet dhe më pagoi për të ndihmuar prindërit e saj”, - tha Cheng. "Meqenëse ajo ka frikë se prindërit e saj mund të mos duan të paguajnë shërbimin, ne ramë dakord të shtiremi si shoqe klase".
“Mendoj se ideja e peizhenshit është të ofrojë shoqëri dhe ndihmë”, - tha ajo. “Do të doja që dikush të shoqëronte prindërit e mi kur unë mos të jem në gjendje ta bëj këtë”.
“Detyrat e punës së ndihmësve në spital kanë nevojë për sqarime të mëtejshme dhe profesionalizmi i tyre duhet të përmirësohet në mënyrë që klientët t'u besojnë më shumë atyre”,- tha He nga Shoqata Kineze e Sigurimeve Shoqërore.
“Përveç ndershmërisë dhe sinqeritetit, ofruesit e shërbimeve duhet të kenë informacionin e nevojshëm për institucionet mjekësore dhe njohuritë mjekësore”, - shtoi ai.
