Restoranti i fshatit olimpik të Pekinit priti në ditë më shumë sportistë se në çdo edicion të lojërave olimpike.

Sipas të dhënave statistikore, nga ora 10 deri në orën 19 të 8 gushtit të këtij viti, që ishte dita e ceremonisë së hapjes së Lojërave Olimpike të Pekinit, gjithsej 18634 veta hëngrën në restorantin kryesor të sportistëve në fshatin olimpik të Pekinit, shifër kjo që është më e madhe se shifrat e Lojërave Olimpike të Sidneit dhe të Athinës, që patën përkatësisht 9876 veta dhe 10515 veta. Në saje të përgatitjeve të kujdesshme paraprake, fshati olimpik i Pekinit plotësoi me sukses detyrën e furnizimit me ushqime dhe puna e tij u vlerësua lart nga Komiteti Olimpik Ndërkombëtar dhe funksionarët e sportistët e delegacioneve sportive të vendeve të ndryshme.

Fshati olimpik i Pekinit priti më shumë figura të rëndësishme politike të vendeve të ndryshme dhe mysafirë të lartë ndërkombëtarë në krahasim me lojërat e mëparshme olimpike.

Gjatë Lojërave Olimpike të Pekinit, numri i mysafirëve të lartë, që vizituan fshatin olimpik, ishte shumë më tepër se sa ishte parashikuar. Jo vetëm numri i tyre ishte shumë i madh, por edhe niveli i tyre ishte i lartë. Aq më tepër, ata vizituan me "goditje të përqendruar". Madje dikush hiperbolizonte: "Në fshatin olimpik, sa të kthesh kokën, mund të ndeshesh me një kryetar shteti." Deri më 14 gusht, fshati olimpik priti gjithsej 62 figura të rëndësishme, përfaqësues të oborreve mbretërore të vendeve të tjera dhe mysafirë të ndryshme që bënë vizitë atje. Ndër ta, ishin edhe presidenti i Francës Sarkozi, kryeministri i Rusisë Putin, kryeministri i Japonisë Fukuda, kryeministri i Australisë Kevin Rud etj. Fshatin olimpik të Pekinit e vizituan edhe kryetari i Komitetit Olimpik Ndërkombëtar Zhak Rog dhe ish-kryetari i këtij komiteti Samarançi.

Fshati olimpik i Pekinit pati më shumë ngjyrë "të gjelbër" se fshatrat olimpike të mëparshme.

Më 13 gusht, sekretari i Departamentit të Thesarit të SHBA-së, zoti Henri Paulson, i dha fshatit olimpik të Pekinit çmimin e artë, që quhet "Çmimi i pararojës së projektimit të vendburimit të energjisë dhe mjedisit". Ai e vlerësoi fshatin olimpik të Pekinit si shembull kinez i kursimit të energjisë.

Për trajtimin e hedhurinave, fshati olimpik i Pekinit ka ndërtuar një sistem të trajtimit biologjik për mbrojtjen e mjedisit, që është sot sistemi më i përparuar i këtij lloji. Me vënien në përdorim të këtij sistemi, çdo ditë trajtohen 6 tonë hedhurina të kuzhinës dhe transportohen jashtë qytetit 52 tonë hedhurina. Përqindja e rishfrytëzimit të hedhurinave ka arritur në 93 për qind. Uji i ngrohtë, që përdorin njerëzit në fshatin olimpik të Pekinit, vjen plotësisht nga sistemi i ngrohjes së ujit me energji diellore dhe, me këtë sistem, mund të kursehen çdo vit 5 milionë kilovat-orë energji elektrike.

Vlen të përmendet posaçërisht ndërtesa e shërbimit në fshatin olimpik të Pekinit, një ndërtesë që kuirsen energji. 80 përqind e energjisë, që konsumohet në këtë ndërtesë, vjen nga energjia e erës, energjia optike, energjia termale dhe energjia e ftohtësisë. Pas Lojërave Olimpike të Pekinit, kjo ndërtesë do të përdoret nga kopshtet e fëmijëve. Është hera e parë në historinë olimpike që një fshat olimpik fitoi "Çmimin e pararojës së projektimit të vendburimit të energjisë dhe mjedisit".

Ceremonitë që organizoi fshati olimpik i Pekinit për nder të delegacioneve sportive të vendeve të ndryshme të botës patën më shumë shkëlqim.

Organizimi i ceremonive për nder të delegacioneve sportive të vendeve të ndryshme ka qenë një nga aktivitetet e rëndësishme të fshatit olimpik të Pekinit në fazën e parë të punës së tij. Në orën 20 e 15 minuta të 9 gushtit, me hyrjen e delegacionit sportiv të Nikaraguas në fshatin olimpik dhe me organizimin e ceremonisë për nder të tij, mori fund me sukses puna 13-ditore e organizimit të ceremonive për nder të sportistëve që u vendosën në fshatin olimpik për të marrë pjesë në Lojërat Olimpike të Pekinit. Brenda 13 ditëve, u organizuan 62 ceremoni për nder të delegacioneve sportive të 204 vendeve dhe rajoneve të botës. Në ditën më të zënë, u organizuan 11 ceremoni për nder të 51 delegacioneve. Gjithsej 1500 gazetarë njoftuan këto ceremoni dhe, në ditën më të zënë, numri i reporterëve arriti në 400 veta.

Të gjitha këto ceremoni u organizuan në mënyrë të shkëlqyeshme dhe u vlerësuan lart nga liderët, mysafirët e lartë dhe sportistët e vendeve të ndryshme. Të gjithë punonjësit, që morën pjesë në organizimin e tyre, punuan me zell për të plotësuar detyrën e vet, pa bërë asnjë gabim.

Pikërisht për punën e tyre të kujdesshme përgatitore, fshati olimpik i Pekinit u vlerësua lart nga sportistët, funksionarët dhe liderët e vendeve të ndryshme. Kryetari i Komitetit Olimpik Ndërkombëtar, Zhak Rog, e vlerësoi fshatin olimpik të Pekinit si fshati më i bukur olimpik dhe tha se populli kinez u përpoq shumë për lojërat olimpike. Sportistët e shumë vendeve thanë se fshati olimpik i Pekinit ka kushte e pajisje të mrekullueshme dhe është fshati olimpik më i mirë e më i bukur që kanë parë ata. Të gjitha këto fjalë vlerësuese vërtetojnë ndjenjat e zjarrta dhe të sinqerta të popullit kinez për frymën olimpike dhe për popujt e botës. (Zheng)