dëgjoni

Para një viti, kryetari i delegacionit olimpik shqiptar Fidel Ylli erdhi në Pekin për të marrë pjesë në akitivitetet me rastin e mbetjes një vit nga hapja e Lojërave Olimpike të Pekinit. Për të, i gjithë Pekini dhe populli i mbarë Kinës ishin gati që atëherë për të pritur Lojërat Olimpike. Tani Fidel Ylli erdhi përsëri në Pekin dhe zhvillimet e ndryshimet e Pekinit gjatë një viti i lanë atij përshtypje edhe më të thella. Ai është i mendimit se organizimi i Lojërave Olimpike e nxiti Pekinin të ketë zhvillime dhe ndryshime kolosale.

"Olimpiada është një sipërmarrje kaq e madhe dhe Kinës i erdhi një fat mjaft i mirë për të organizuar një olimpiadë, jo vetëm për të treguar zhvillimin e madh të viteve të fundit, por edhe për të shfaqur potencialin e këtij vendi të madh. Sporti sjell zhvillim edhe në fusha të tjera, si në ekonomi, në ndërtim, në turizëm, prandaj sporti është një sipërmarrje kaq e madhe. Në krahasim me një vit më parë kur kam qenë këtu, në Pekin kanë ndodhur ndryshime kolosale.

Ylli tha se komunikacioni i Pekinit është zhvilluar më tej, ndërtimet janë më të bukura, kudo mund të takosh vullnetarë. Lidhur me shërbimet e Komitetit Organizativ të Lojërave Olimpike të Pekinit, Ylli i vlerësoi shumë lart ato. Ai, që ka marrë pjesë në Lojërat Olimpike të Sidneit dhe të Athinës, çmoi lart veçanërisht kushtet shumë të mira të Fshatit Olimpik. Ai tha se, përveç instalimeve, edhe shërbimet e Fshatit Olimpik e bënë atë të ndihet si në familjen e vet:

"Unë jam pjesëmarrës në disa olimpiada, por Fshati Olimpik i Pekinit është një mrekulli, për sa u përket investimeve për ndërtimin e godinave, dhomave të fjetjes, infrastrukturës brenda dhe, në fund të fundit, shërbimeve me vullnetarë. Në hyrje të çdo godine ose apartamenti rrinë për të na nderuar 3 a 4 vullnetarë, që na përshëndesin 'Mirë se erdhët! Mirëmbrëma! Natën e mirë!' etj., me një edukatë që nuk e kam parë në vende të tjera."

Shumë miq të huaj thonë se produktet ushqimore të Pekinit u kanë lënë atyre përshtypje të thella, gjithashtu shumë prej tyre pëlqejnë mallrat e mira me çmime të ulëta të Pekinit. Ylli i tha gazetarit se, në krahasim me këto, atij i pëlqen më shumë puna organizative, e rregullt dhe e saktë. Mbresa më e thellë nga Pekini është se gjithçka është në rregull:

"Unë jam njeri që më pëlqejnë rregulli dhe saktësia. Mua më pëlqejnë rregulli që kanë kinezët, që çdo gjë duhet të jetë në vendin e vet. Jam shumë i kënaqur se këtu çdo punë është e planifikuar dhe e studiuar mirë, prandaj Kina ka marrë këtë zhvillim shumë të madh. Në Kinë, çdo gjë është e saktë dhe në vendin e vet."

Përveç ndryshimeve kolosale të qytetit, Ylli është i mendimit se përfitimet më të mëdha nga ardhja në Pekin janë edhe njohja e shumë miqve, Lojërat Olimpike i lidhin shpejt njerëzit në miqësi: 

"Unë lidha miqësi me miq nga vende të ndryshme, sidomos me ata të komiteteve olimpike të vendeve të tjera, me të cilët takohemi në çdo aktivitet. Kjo është miqësia e familjes olimpike."

Ylli na tha se, pasi të kthehet në Shqipëri, do t'u tregojë të gjithëve se sa i bukur është Pekini, sa mahnitës është zhvillimi i këtij qyteti, në mënyrë që më shumë njerëz të ndajnë me të gëzimet që ka ndier ai gjatë kohës së bukur që ka kaluar këtu:

"Unë do t'u tregoj jo vetëm njerëzve të familjes, por edhe të gjithë miqve të mi. Si kryetari i delegacionit shqiptar, gjatë dy javëve të fundit, unë e kam propaganduar gjithmonë në media Kinën. Jo thjesht se duhet bërë ose se më ka detyruar njeri, por me të vërtetë meriton për të thënë fjalët më të mira për sa i përket gjithçkaje që unë kam parë, për sa i përket zhvillimit të vendit, për sa u përket çmimeve, për sa i përket ndërtimit të godinave e hoteleve. Gjithçka që pashë këtu ia vlen për t'ua thënë njerëzve."

Në fund të intervistës, ai i tha gazetarit: "Do të vij përsëri për të parë Pekinin. Jam i bindur se atëherë do të kem edhe një ndjenjë tjetër. Jepi forca, Pekin!" ( Zhai) ( Artan)